Þjóðaröryggisstofnun Bandaríkjanna hleraði síma Martins Luthers King, þekktasta leiðtoga bandarískra blökkumanna og réttindabaráttu þeirra, þegar mótmælin gegn Víetnamstríðinu stóðu sem hæst. Þetta kemur fram í opinberum skjölum sem birt hafa verið í Bandaríkjunum.
Þjóðaröryggisstofnunin njósnaði einnig um hnefaleikakappann Muhammed Ali, Tom Wicker, blaðamann New York Times , og Art Buchwald, blaðamann Washington Post . Stofnunin hleraði ennfremur síma tveggja öldungadeildarþingmanna, demókratans Franks Church og repúblikanans Howards Baker.
Njósnirnar voru liður í eftirliti sem beindist einkum að andstæðingum Víetnamstríðsins. Eftirlitið var fyrst afhjúpað á áttunda áratug aldarinnar sem leið en nöfnum þeirra sem njósnað var um hefur verið haldið leyndum þar til nú.