Vímuvarnavikan Vika 43 stendur núna yfir og af því tilefni var Kristjáni Þór Júlíussyni heilbrigðisráðherra fært innrammað þakkarskjal frá samstarfsráði um forvarnir vegna ákvörðunar ríkisstjórnar Íslands um að setja „forvarnir í öndvegi“ í stjórnarsáttmálanum. Þar stendur m.a. „Bætt lýðheilsa og forvarnastarf verður meðal forgangsverkefna ríkisstjórnarinnar.“ Það var Hildur Helga Gísladóttir, formaður samstarfsráðs um forvarnir, sem afhenti ráðherra skjalið og hvatti í leiðinni ráðherra og ríkisstjórn til að efla enn frekar brautargengi félagasamtaka í forvarnastarfi á komandi misserum.
Að Viku 43 – vímuvarnaviku stendur samstarfsráð um forvarnir ásamt 24 félagasamtökum sem að þessu sinni beina kastljósinu að mikilvægi samtakamáttar allra um áherslur í forvörnum og heilsueflingu.