Isavia ætlar að áfrýja ákvörðun

Isavia telur sig ekki hafa heimildir til þess að grípa til ráðstafana um úthlutun afgreiðslutíma á Keflavíkurflugvelli sem Samkeppniseftirlitið mælist til í ákvörðun sinni sem birt var í gær. Isavia hyggst áfrýja ákvörðun stofnunarinnar.

Wow Air hafði kvartað til Samkeppniseftirlitsins vegna úthlutunar á afgreiðslutímum fyrir flugvélar á flugvellinum og taldi hana samkeppnishamlandi.

Tryggi afgreiðslutíma

Samkeppniseftirlitið komst að þeirri niðurstöðu að núverandi fyrirkomulag hefði leitt til þess að Icelandair, langstærsti keppninautur Wow Air, hefði í raun haft forgang að nær öllum mikilvægustu afgreiðslutímum á flugvellinum.

Auk þess hefði Icelandair notið forgangs við úthlutun á nýjum afgreiðslutímum á álagstímum sem úthlutað var í sumar þegar afkastageta Keflavíkurflugvallar var aukin. Þetta hafi að mati Samkeppniseftirlitsins skaðleg áhrif á samkeppni og hindri innkomu nýrra aðila á áætlunarflugsmarkað á Íslandi. Núverandi fyrirkomulag valdi því flugfarþegum tjóni.

Því beindi Samkeppniseftirlitið þeim fyrirmælum til Isavia að félagið tryggði keppinauti í flugi til og frá Íslandi aðgang að samkeppnislega mikilvægum afgreiðslutímum.

Evrópskar reglur

Isavia telur sig hins vegar ekki hafa valdheimildir til að verða við þessum tilmælum eftirlitsins. Í yfirlýsingu segist félagið ekki vera úthlutunaraðili afgreiðslutíma áætlunarflugvéla á Keflavíkurflugvelli. Úthlutun tímanna fari hins vegar fram í samræmi við reglur evrópska efnahagssvæðisins sem teknar voru upp hérlendis árið 2006. Hún sé framkvæmd af óháðum alþjóðlegum aðila og telur Isavia sér óheimilt að grípa inn í með þeim hætti sem Samkeppniseftirlitið óskar. Því ætli félagið væntanlega að áfrýja ákvörðun stofnunarinnar.