<strong>Jack Dorsey</strong>, stofnandi Twitter, greindi frá því í viðtali í lok síðasta árs að það hefði komið til tals að Twitter ætti að heita Twitch. Fyrsta tístið kom frá téðum Dorsey í mars 2006. Þá notaði hann orðið Twttr því hann vildi höfða til yngra fólks. Það hins vegar náði aldrei fótfestu.
Skráðir notendur Twitter eru 2,4 milljarðar. Þar af eru 1,2 milljarðar símanotendur. 215 milljónir manna eru svokallaðir mánaðarnotendur og yfir 100 milljónir manna tísta á hverjum degi.
Teiknimyndin Castle in the Sky á metið yfir flest tíst þar sem minnst er á ákveðinn viðburð. Teiknimyndin var sýnd í Japan 2013 og minntust 143.199 tíst á sekúndu á teiknimyndina.
Vinsælasta hashtag Íslands er #boladagur en árlega er keppt í Boladeginum sem gengur út á að angra erlendar stórstjörnur. Alls voru send um 9.000 tíst til stórstjarna í síðustu keppni. Það gera 375 tíst á klukkustund allan sólarhringinn eða tíst á 10 sekúndna fresti. Sindri Snær Jensson vann keppnina árið 2013 fyrir frábæra frammistöðu. Keppt verður að nýju í mars.
Mest var endurtíst á Barack Obama þegar hann tísti hin einföldu en sterku orð: Fjögur ár til viðbótar. 770 þúsund manns endurtístu þessi orð. Leikkonan Lea Michele fékk 408.266 endurtíst þegar hún tísti um dauða samleikara síns úr Glee, Corys Monteiths. Þá var endurtíst um dauða leikarans Pauls Walkers yfir 400 þúsund sinnum.
Leikarinn Ashton Kutcher var fyrsti maðurinn til að fá yfir milljón fylgjendur. Það gerði hann árið 2009, þremur árum eftir að hann stofnaði notendareikning sinn. Leikarinn Charlie Sheen stofnaði reikning eftir að hafa verið rekinn úr sjónvarpsþáttunum Two and a half men og það tók hann 25 klukkutíma að ná milljón fylgjendum.
Söngkonan Katy Perry er vinsælasti einstaklingurinn á Twitter með 50 milljón fylgjendur. Í byrjun febrúar fór hún yfir 50 milljón manna markið. Söngvarinn Justin Bieber er næstur með 49,2 milljónir og Barack Obama bandaríkjaforseti þriðji. Björk er vinsælasti Íslendingurinn en 500 þúsund manns fylgja poppstjörnunni. Hljómsveitin Of Monsters and men fær silfrið og Sigur Rós bronsið.
[ Smellið til að sjá stærri mynd ]
Æ fleiri Íslendingar eru farnir að notast við Twitter. Sjónvarpsþættir eins og Sunnudagsmorgunn og Mín skoðun sem og beinar útsendingar frá íþróttaviðburðum notast við hashtag-merkið til að fólk geti tekið þátt í umræðunni. Benedikt Bóas benedikt@mbl.is