Fréttaskýring
Víðir Sigurðsson
vs@mbl.is
Kannski muna einhverjir af minni kynslóð eftir sjónvarpsþáttum með nafninu sem er í fyrirsögninni hér að ofan. Hún kom allavega upp í hugann þegar þrír landsliðshópar yngri karlalandsliða Íslands í fótbolta voru skoðaðir en þeir voru tilkynntir í vikunni vegna verkefna á næstu dögum.
Í landsliðunum U21 árs, U19 ára og U17 ára eru hvorki fleiri né færri en 20 piltar sem eru á mála hjá erlendum félögum.
Tíu í U21 árs liðinu sem leikur Evrópuleik í Kasakstan næsta miðvikudag, sjö í U19 ára liðinu sem mætir Svíum í vináttulandsleikjum í Kórnum og Egilshöll á þriðjudag og fimmtudag, og þrír í U17 ára liðinu sem leikur vináttuleiki við Norðmenn í Kórnum í dag og á sunnudaginn.
Bæði yngri liðin komust í milliriðla Evrópukeppninnar og leikir þeirra á næstu dögum eru liður í undirbúningi fyrir þau verkefni. Strákarnir í 21 árs landsliðinu eru í hörkuslag um að komast í umspil fyrir úrslitakeppni Evrópumótsins og sigur í Kasakstan yrði stórt skref á leiðinni þangað.
Og það magnaða er að fjórir sem eru í 21 árs hópnum eru enn gjaldgengir í U19 ára liðið, þar með taldir báðir markverðirnir, Rúnar Alex Rúnarsson og Frederik Schram. Hlutföllin eftir aldri eru því sex, ellefu og þrír.
Eins og sjá má á kortinu til hliðar dreifast piltarnir á félög víðsvegar um Evrópu.