Jón Snorri Þorleifsson, fv. formaður Trésmiðafélags Reykjavíkur og framkvæmdastjóri Sambands byggingamanna, lést sl. föstudag, 84 ára að aldri.
Jón Snorri fæddist 3. júní 1929 í Haukadal í Dýrafirði, sonur hjónanna Þorleifs Júlíusar Eggertssonar, kennara, og Jóhönnu Bjarneyjar Guðjónsdóttur, húsmóður.
Hann stundaði nám í trésmíði við Iðnskólann í Reykjavík, lauk sveinsprófi 1949 og fékk meistararéttindi 1952.
Jón Snorri var formaður Trésmiðafélags Reykjavíkur í samfellt 18 ár, 1960-1978, en á þeim árum var félagið eitt öflugasta iðnaðarmannafélag landsins. Þá sat hann í miðstjórn Alþýðusambands Íslands 1968-1980. Hann stóð að stofnun Sambands byggingamanna, var framkvæmdastjóri þess frá 1966 til 1980 og sá um samskipti við norræn systursambönd.
Jón Snorri var í stjórn Alþýðubandalagsins í Reykjavík á árunum 1973-1978 og sat í borgarstjórn Reykjavíkur 1967-1971. Þá var hann varaþingmaður Reykvíkinga 1968 til 1974 og sat sex sinnum á Alþingi.
Árið 1987 hóf Jón Snorri störf sem ráðgjafi fyrir alkóhólista á vegum samtakanna Vonar-Veritas. Hann fluttist til Svíþjóðar 1988 og starfaði þar einnig sem ráðgjafi fyrir alkóhólista. Hann dvaldi um tíma í Bandaríkjunum en flutti aftur til Íslands 2002.
Eiginkona Jóns Snorra var Benedikta Sigurrós Sigmundsdóttir. Þau skildu. Þau eignuðust 6 börn og Jón Snorri átti einnig son með Ásu Jóhannesdóttur.