Feðgar í golfi Jóhannes Óli og Ólafur Hreinn á Flórída.
Barnabarnabörnin Jóhannes og Hulda með yngstu kynslóðinni, Benjamín Orra, Emblu Rán og Alexander Breka.
Í blíðu og stríðu í hálfa öld Jóhannes Óli og Hulda, eiginkona hans, með gullbrúðkaupstertuna fyrir sig á stóra deginum í lífi þeirra.
[ Smellið til að sjá stærri mynd ]
Jóhannes fæddist á Akureyri 16.5. 1939 og ólst þar upp á Eyrarlandsvegi 27. Hann var í Barnaskóla Akureyrar og Gagnfræðaskóla Akureyrar, stundaði nám við MA og lauk stúdentsprófi þaðan 1959.

Jóhannes fæddist á Akureyri 16.5. 1939 og ólst þar upp á Eyrarlandsvegi 27. Hann var í Barnaskóla Akureyrar og Gagnfræðaskóla Akureyrar, stundaði nám við MA og lauk stúdentsprófi þaðan 1959.

Jóhannes var tíu sumur í sveit, fyrst hjá afa sínum og ömmu á Syðsta-Kambhóli í Arnarneshreppi, síðan á Stóru-Laugum í Reykjadal í Suður-Þingeyjarsýslu og síðasta sumarið á Neðri-Dálksstöðum á Svalbarðsströnd.

Jóhannes var á síld á sumrin 1957-61. Hann var kennari í Vík í Mýrdal 1959-61, stundaði námi í landafræði og ensku við HÍ 1961-63, var stundakennari í Vogaskóla í Reykjavík 1961-62 og bifreiðarstjóri og síðar verkstjóri í Fínpússningargerðinni og Sandsölunni í Reykjavík 1962-67. Jóhannes var matvörukaupmaður í verslununum Selási og Ólakjöri í Reykjavík 1967-74. Hann var sjómaður á Dagfara ÞH-70 1973-75 sem var á síld í Norðursjónum og á loðnu og netum, var fyrst vörubílstjóri og síðar framkvæmdastjóri hjá Selásverki 1975 og 1981-86. Hann var framkvæmdastjóri og síðar formaður Félags landeigenda í Selási 1976-82.

Jóhannes var vallastjóri Íþróttavalla Reykjavíkur 1986-2009 er hann lét af störfum og embættið var lagt niður. Hann hefur síðan sem verktaki séð um hitakerfi gervigrasvallanna í Reykjavík.

Formaður Fylkis í 15 ár

Jóhannes sat í stjórn Félags matvörukaupmanna í nokkur ár, var einn stofnenda IMA, Innkaupasambands matvörukaupmanna, sat í stjórn Framfarafélags Seláss og Árbæjarhverfis í mörg ár, var varaformaður Félags sjálfstæðismanna í Selási, Árbæ og Ártúnsholti, gjaldkeri Íþróttafélagsins Fylkis 1977-82 og formaður Fylkis 1982-97, lengur en nokkur annar. Jóhannes er nú varaformaður Korpúlfa, félags eldri borgara í Grafarvogi.

Jóhannes sinnir fjölskyldunni, golfi, göngum, ferðalögum og ættfræði, þegar tími gefst til, en hann er enn önnum kafinn við hin ýmsu verkefni: „Ég byrjaði í golfi 1989 og hef haft mikla ánægju af því síðan, hér heima og erlendis. Ég hef alltaf haft ánægju af því að hreyfa mig og fjölgað gönguferðum í seinni tíð, ef eitthvað er. Þá hef ég lengi haft áhuga á ættfræði, kíki oft til hans Odds í Skerjafirðinum og hef gaman af að grúska í gömlum skræðum.“

Jóhannes var sæmdur gullmerki ÍBR og gullmerki KSÍ. Hann er heiðursfélagi SÍGÍ, Samtaka íþrótta- og golfvallastarfsmanna á Íslandi, og heiðursfélagi Fylkis.

Fjölskylda

Jóhannes kvæntist 5.6. 1960 Huldu Jóhannsdóttur, f. 23.1. 1941, fyrrv. innheimtufulltrúi hjá Securitas. Foreldrar Huldu voru Jóhann Guðmundsson, f. 22.11. 1916, d. 10.2. 1989, verkstjóri á Akureyri, og k.h., Ólöf Ingimarsdóttir, f. 12.6. 1918, d. 15.12. 1993, húsfreyja.

Synir Jóhannesar og Huldu eru Jóhann Garðar, f. 5.2. 1961, húsasmiður og tamningamaður í Laufási í Ásahreppi, sambýliskona hans er Eydís Indriðadóttir og sonur, Guðmundur Óli; Brynjar, f. 10.11. 1963, ráðgjafi hjá Mótus, búsettur í Reykjavík en kona hans er Steinunn Braga Bragadóttir og eru börn þeirra Hulda Björk, Viktor Bragi og Ester Rós; Ólafur Hreinn, f. 30.3. 1968, PGA golfkennari, búsettur í Kópavogi en kona hans er Bryndís Eva Jónsdóttir og eru börn hans Arnar, Hanna Ósk og Ásgeir.

Barnabarnabörn Jóhannesar og Huldu eru Alexander Breki Arnarson og Embla Rán Arnarsdóttir, og Benjamín Orri Hulduson.

Systkini Jóhannesar eru Anna, f. 20.10. 1941, fyrrv. verslunarmaður, búsett í Reykjavík; Magnús Örn, f. 11.6. 1951, skipstjóri í Reykjavík; Kristján Björn, f. 15.2. 1953, verkfræðingur við Slippstöðina á Akureyri; Ingvar, f. 9.4. 1957, rafmagnseftirlitsmaður á Akureyri, og Bergur, (kjörbróðir) f. 15.3. 1957, skipstjóri á Akranesi.

Foreldrar Jóhannesar voru Garðar Benedikt Ólafsson, f. 19.10. 1908, d. 17.8. 1998, efnisvörður hjá Rafveitu Akureyrar, og k.h., Jakobína Anna Magnúsdóttir, f. 30.8. 1920, d. 1.2. 1996, húsfreyja.