Endurnýjun Gangandi vegfarendur fá aukið pláss á kostnað bíla þegar lokið verður endurbótum á Pósthússtræti á milli Austurstrætis og Tryggvagötu. Verkinu á að ljúka í júlí.
Endurnýjun Gangandi vegfarendur fá aukið pláss á kostnað bíla þegar lokið verður endurbótum á Pósthússtræti á milli Austurstrætis og Tryggvagötu. Verkinu á að ljúka í júlí. — Morgunblaðið/Ómar
Snurfusað Verið er að fjarlægja hráefnisþró og bragga við gömlu fiskimjölsverksmiðjuna í Örfirisey.
Hótel Nýtt hús rís á horni Pósthússtrætis og Tryggvagötu, þar sem skúrarnir eru á bak við Bæjarins bestu. Hótel verður rekið í húsinu og aðliggjandi byggingum.
[ Smellið til að sjá stærri mynd ]
Helgi Bjarnason helgi@mbl.is Sumarið er tími framkvæmda í borgum og bæjum. Í Reykjavík er unnið að úrbótum á götum og á lóðum einkafyrirtækja á nokkrum stöðum. Pósthússtræti tekur stakkaskiptum við endurnýjum á milli Austurstrætis og Tryggvagötu.

Helgi Bjarnason

helgi@mbl.is

Sumarið er tími framkvæmda í borgum og bæjum. Í Reykjavík er unnið að úrbótum á götum og á lóðum einkafyrirtækja á nokkrum stöðum.

Pósthússtræti tekur stakkaskiptum við endurnýjum á milli Austurstrætis og Tryggvagötu. Ístak hóf framkvæmdir í apríl og á þeim að ljúka í júlí. Þessa dagana er unnið að endurnýjun fráveitu- og kaldavatnslagna.

Gangstéttir á þessum kafla götunnar verða hellulagðar og einnig akbrautin á milli Austurstrætis og Hafnarstrætis en kaflinn að Tryggvagötu malbikaður. Gangstéttir breikka, snjóbræðsla kemur undir götuna og nýir ljósastaurar rísa. Við Tryggvagötu verður gerður haus að vestan og upphækkuð hellulögð gönguleið yfir Tryggvagötu.

Í þessum áfanga endurbóta á Pósthússtræti er ekki gert ráð fyrir framkvæmdum við torg á mótum Pósthússtrætis og Tryggvagötu, þar sem pylsuvagn Bæjarins bestu er. Áformað er að rífa geymsluskúra sem tilheyrðu verslun Ellingsen á sínum tíma en leigubílastöðin Borgarleiðir notaði í mörg ár. Á lóðinni sem telst til Hafnarstrætis 17-19 á að byggja hótel og er ætlunin að byrja í sumar. Á teikningum er gert ráð fyrir því að Bæjarins bestu standi á sínum stað á umræddu torgi.

Verksmiðjuhúsið lagfært

Vestur á Granda stendur HB Grandi í framkvæmdum til að fegra umhverfið. Verið er að rífa bragga og hráefnisþró við fiskimjölsverksmiðjuna í Örfirisey. Verksmiðjuhúsið mun standa áfram en verið er að lagfæra það að utan. Samkvæmt upplýsingum Jónasar Guðbjörnssonar fjármálastjóra hefur ekkert verið ákveðið um nýtingu hússins sem lengi hefur staðið ónotað. Það er verksmiðjubygging, einn geimur en með pöllum á nokkrum hæðum. „Við vonumst til að húsið verði til prýði á sjómannadaginn,“ segir Jónas.