Einstakir kroppar og hugvitssamleg norn

Við erum öll einstök

Bókin er skrifuð með það að markmiði að efla heilbrigða líkamsmynd barna og virðingu fyrir fjölbreytileikanum. Í fyrri hluta bókarinnar er farið yfir það hversu mikil listasmíð líkaminn er. Minnt er á að líkaminn sé klár enda lætur hann okkur vita hvað hann þarf til að líða vel. Í framhaldinu er lögð áhersla á mikilvægi þess að hlusta á líkamann. Síðast en ekki síst er áhersla lögð á að líkamar eru alls konar og að fjölbreytnin sé af hinu góða, enda væri leiðinlegt í heimi þar sem allir væru steyptir í nákvæmlega sama mót.

Hér er á ferðinni sérlega falleg bók með mikilvægan boðskap. Textinn er skýr og talar til barna allt niður í þriggja ára. Myndirnar eru skemmtilegar og tjáningarríkar.

Áræðin og úrræðagóð norn

Það er fagnaðarefni að sífellt fleiri bækur um hina stórskemmtilegu Nönnu norn og köttinn hennar Njörð skuli koma út á íslensku í prýðisgóðri þýðingu Hallgríms H. Helgasonar. Nýju bækurnar tvær sem bættust í safnið fyrr í sumar rúma hvor um sig fjórar sögur. Allar eiga sögurnar það sameiginlegt að uppbygging þeirra er skýr þar sem Nanna þarf að takast á við tiltekið verkefni, þraut eða þolraun og lærir af reynslunni. Heilt yfir eru sögurnar í Nönnu pínulitlu aðeins betur formaðar og skemmtilegri.

Nanna er yndislega úrræðagóð þótt það komi henni stundum í vandræði, eins og þegar hún t.d. minnkar sjálfa sig til að passa í fötin sín sem hlaupu í þvotti. Meðal þess sem Nanna lærir er að fara skuli varlega þegar maður óskar sér og að ekki er hægt að gera sig ósýnilegan með því einu að halda fyrir augun.

Húmorinn sem birtist í sögunum er oft á tíðum dásamlegur og ekki erfitt að heillast af því hversu jákvæð Nanna er og áræðin.

Myndir Korky Paul eru stórskemmtilegar og bæta miklu við upplifun lesandans. Uppsetning bókanna er með þeim hætti að auðvelt er fyrir byrjendur í lestri að æfa sig og ekki spillir fyrir að auk einnar til tveggja aðalmynda á hverri opnu eru alls kyns krúsídúllur víðs vegar á síðunum þar sem sjá má m.a. maura, eðlur, flugur og kóngulær sem ýta undir stemningu bókanna.

Máttlaus hrekkjalómur

Líkt og bækurnar um Nönnu norn eru bækurnar um Skúla skelfi ætlaðar byrjendum í lestri. Martröð Skúla skelfis inniheldur fjórar sögur þar sem töluvert fer að vanda fyrir hrekkjabrögðum aðalpersónunnar. Skúli telur sig iðulega vera mjög snjallan í samskiptum sínum við t.d. litla bróðurinn Finn, en fær oftast nær makleg málagjöld. Sögurnar eru mjög misgóðar, uppbyggingin mætti vera skýrari og endir sagnanna er oft óþarflega snubbóttur.

Texti Francescu Simon er uppfullur af útskrifuðum áhrifshljóðum á borð við „Hrifs. Smjatt smjatt. Hrifs. Bryðja bryðja. Hrifs. Háma háma.“ (bls. 37) eða „Úúúúúúúúú! BÖÖÖÖÖÖÖÖÖÖÖÖÖÖ!“ (23) sem minnir frekar á niðurskrifað handrit að sjónvarpsþáttunum um Skúla skelfi í stað bókar.

Risaeðlubók Skúla skelfis nær alls ekki sama flugi og bók hans um líkamann sem út kom í fyrra. Í bókinni er vissulega að finna ýmsan fróðleik um risaeðlurnar, en alltof stór hluti bókarinnar fer í upptalningu á dýraheitum með örstuttri útlitslýsingu sem skilar lesendum þó litlu, samanber: „Vargeðla (Coelurus) var lítil og létt risaeðla með hnefastóran haus.“ (25) Guðni Kolbeinsson þýðandi fær hrós fyrir að setja fræðiheitin á risaeðlunum innan sviga þannig að lesendur geti leitað skepnurnar uppi á netinu og skoðað myndir af þeim. Ekki veitir af því lesendur eru litlu nær um útlit þeirra út frá myndum Tony Ross.