31. júlí 1955 „Úrkoma í Reykjavík alla daga júlímánaðar,“ sagði í frétt Morgunblaðsins af rigningarsumrinu mikla en árin á undan höfðu að meðaltali verið þrettán rigningardagar í júlí. Aldrei höfðu mælst færri sólskinsstundir í mánuðinum....
31. júlí 1955
„Úrkoma í Reykjavík alla daga júlímánaðar,“ sagði í frétt Morgunblaðsins af rigningarsumrinu mikla en árin á undan höfðu að meðaltali verið þrettán rigningardagar í júlí. Aldrei höfðu mælst færri sólskinsstundir í mánuðinum.
31. júlí 1999
Tónlistarmaðurinn Mick Jagger birtist óvænt á Ísafirði, ferðaðist á snekkju um Hornstrandir og fór víðar. „Af öllu ótrúlegu þá hefði mér fundist það ótrúlegast að eiga eftir að hitta Mick Jagger á götuhorni á Ísafirði,“ sagði Ólafur Helgi Kjartansson sýslumaður og aðdáandi Rolling Stones í 36 ár í viðtali við Morgunblaðið.
31. júlí 2008
Kristinn Gunnarsson apótekari varð skattakóngur þegar álagningarskrár voru birtar, átti að greiða rúmar 450 milljónir króna í opinber gjöld. Þetta var talið Íslandsmet.
31. júlí 2009
Handrit Árna Magnússonar voru skráð á heimslista UNESCO yfir merkustu menningarminjar heims. Þau eru um þrjú þúsund og flest frá miðöldum.
31. júlí 2011
Annie Mist Þórisdóttir sigraði á heimsleikum í „crossfit“ í Los Angeles. „Hraustasta kona í heimi,“ sagði DV. Hún vann aftur ári síðar.Dagar Íslands | Jónas Ragnarsson