Jólaloftárásir – opið bréf til Bandaríkjaforseta

Hr. Barack Hussein Obama.

Þegar ég horfi á eldflauga- og sprengjuárásirnar á Gaza núna minnist ég jólaloftárásanna 1972 þegar Kissinger lét Nixon fyrirskipa loftárásir á Hanoi enda þótt búið væri að ná samkomulagi um frið í Víetnam í Parísarviðræðunum 27. október. Kissinger vidi láta á það reyna hvort ekki væri hægt að hnika þeim niðurstöðum. Þúsundir manna voru myrtar af Bandaríkjaher í þessum grimmdarlegu loftárásum á þéttbýlissvæði án nokkurs tilgangs. Heimurinn stóð á öndinni og alls staðar var mótmælt, líka á Íslandi. Engu var hnikað með fjöldamorðunum og friðarsamkomulagið undirritað 27. janúar 1972.

Eid eru jól múslima, haldin í lok föstumánaðarins Ramadan. Í nokkra klukkustunda uppstyttu árása á laugardaginn voru foreldrar komnir út, leitandi að einhverju til að gefa börnunum í Eid-gjöf. Á Al Jazeerah-sjónvarpsstöðinni heyrðist í föður sem hafði leitað sonar síns í þrjá daga. Það hafði tekið tíma að komast að rústunum og grafa upp líkin þar sem sonur hans fannst. Það hjálpaði honum að óvissan var á enda. Eid í ár eru Eid píslarvotta og særðra, sagði hann.

Tilraunir Kerry, utanríkisráðherra Bandaríkjanna, til að koma á vopnahléi á Gaza ásamt tilraunum Ban Ki-Moon og Öryggisráðs Sameinuðu þjóðanna hafa allar runnið út í sandinn. Kerry er hæddur og svívirtur í ísraelskum fjölmiðlum og ekki í fyrsta sinn.

Netanyahu hefur staðið við eitt, það er halda grimmdaræðinu gangandi og skella skollaeyrum við hverju sem sagt er utan Ísraels varðandi stríðsreksturinn, hvers kyns mótmælum almennings í heiminum og þjóðarleiðtoga. Netanyahu sagði að Ísrael myndi fara sínu fram án tilllits, og það hefur þessi stríðsglæpastjórn gert. Ísraelsstjórn er ekkert heilagt í þessu einhliða stríði sem líkist æ meir útrýmingarherferð nasista, þar sem gyðingar voru lokaðir inni í gettói og síðan var gengið til verks við að myrða þá hvern á fætur öðrum. Þannig eru íbúar Gaza lokaðir inni í risastóru gettói, fangelsi undir opnum himni, þaðan sem enginn kemst burt, hvorki á sjó, landi né lofti.

Þetta er ekki stríð gegn Hamas, heldur gegn palestínsku þjóðinni, íbúum Gaza-svæðisins. Og þetta er fyrst og fremst útrýmingarherferð gegn börnum, því að meirihluti íbúanna er börn. Einn af þingmönnum flokksins Gyðingaheimilli (Jewish Home) hefur lýst því yfir að myrða beri allar palestínskar mæður svo að þær ali ekki af sér fleiri snáka, því að öll palestínsk börn eru snákar að hennar mati og tilvonandi hryðjuverkamenn.

Minnst á hryðjuverk, þá er það rétta orðið yfir stríðsrekstur Ísraels sem beinist nær alfarið að palestínskum börnum og fjölskyldufólki og getur ekki haft annan tilgang en að hræða og skapa skelfingu með morðum og sprengjuárásum á heimili fjölskyldna, skóla, bænahús, sjúkrahús, heilsugæslustöðvar, heimili fyrir fatlaða og sjónvarpsstöðvar.

Þung ábyrgð hvílir á þér, Obama Bandaríkjaforseti, sem getur stöðvað barnamorðin ef þú kærir þig um í stað þess að klifa á rétti Ísraelsmanna til að verja land sitt. Blóðbaðið heldur áfram og þú herra forseti og Kerry utanríkisráðherra byrjið sérhverja ræðu á heilshugar stuðningi við árásarstríð Ísraels. Þið hafið á orði frómar óskir um vopnahlé en gerið ekkert til að fylgja því eftir.

Hvað getum við gert? Stjórnmálamenn, verkalýðshreyfing og önnur fjöldasamtök og íslenska þjóðin upp til hópa tekur afdráttarlausa afstöðu gegn blóðbaðinu á Gaza og krefst þess að umsátrinu verði aflétt. Alþingi Íslands og ríkisstjórn hafa viðurkennt Palestínu sem sjálfstætt og fullvalda ríki og að hernáminu verði aflétt og að Palestínumenn fá frelsi og sjálfsákvörðunarrétt. Og núna þurfa þeir alþjóðlega vernd tafarlaust.

Ísland hefur frá upphafi sýnt Ísraelsríki mikla vinsemd, en vinur er sá er til vamms segir. Ísraelsríki er undir stjórn stríðsglæpamanna sem skella skollaeyrum við öllum mótmælum. Við hljótum því að snúa okkur að Bandaríkjastjórn og þér, herra forseti, Barack Obama, og krefjast þess að þú látir af stuðningi við blóðbaðið og stöðvir það þegar í stað. F16-árásarvélarnar, skriðdrekarnir, drónarnir, njósnatækin til að miða út skotmörk, allt er þetta tilkomið fyrir tilverknað og fjármuni Bandaríkjanna.

Obama, stöðvaðu fjöldamorðin strax. Þú getur það, ef þú vilt.