„Erum margar jafnar“

EM í frjálsum

Þorkell Gunnar Sigurbjörnsson

thorkell@mbl.is

Aníta Hinriksdóttir hefur í dag keppni á Evrópumótinu í frjálsíþróttum í Zürich þegar hún keppir í undanrásum 800 metra hlaupsins klukkan rúmlega 10.

Aníta hljóp 400 metra hlaup í bikarkeppni frjálsíþróttasambandsins á Laugardalsvelli um helgina, sem henni fannst fín upphitun fyrir 800 metra hlaupið í Zürich. „Þetta gefur svona ákveðna tilfinningu að hlaupa 400 metra hlaup og bara skemmtilegt. Þannig að þetta var bara fínt,“ sagði Aníta þegar Morgunblaðið spjallaði við hana í Laugardalnum um helgina.

Aníta segist spennt fyrir EM í Zürich og að það sé fínt að fara á EM svona stuttu eftir HM ungmenna í Eugene í Bandaríkjunum þar sem hún keppti til úrslita í 800 metra hlaupi í síðasta mánuði. „Jú, ég er bara sátt með það. Ég er bara jákvæð fyrir þessu,“ sagði Aníta.

Verður góð reynsla

Aníta er ein fimm Íslendinga sem keppa á EM, spjótkastarinn Ásdís Hjálmsdóttir reyndi fyrir sér í gær og Hafdís Sigurðardóttir í langstökki. Hafdís keppir líka í 200 metra hlaupi á EM, en fjallað erum árangur Ásdísar og Hafdísar á EM í gær á síðu 1 í íþróttablaðinu í dag. Guðmundur Sverrisson mun svo keppa í spjótkasti á EM og Kári Steinn Karlsson í maraþoni.

Aníta segir gott að vera hluti af liði. „Við höfum nú yfirleitt verið nokkur sem höfum farið á þessu síðustu mót sem ég hef keppt á erlendis. Það er auðvitað alltaf skemmtilegra eftir því sem það eru fleiri frá Íslandi,“ sagði Aníta Hinriksdóttir.