Ingveldur Geirsdóttir
ingveldur@mbl.is
„Það er ekki vafamál að hér í stokkum og steinum búa álfar og huldufólk. Þó að við sjáum það ekki finnum við hlýjuna og vinsemdina frá umhverfinu. Maður er svona klikkaður,“ segir Ragnheiður Jóhannsdóttir handverkskona og skellihlær. „Ég hef ekki séð álfa en ég lék mér nú hinsvegar við einhverja stelpu í gamla daga sem enginn kannaðist við nema ég, ég veit ekkert hvernig það var tilkomið en ég man bara hvað hún átti rosalega fallegan kjól.“
Ragnheiður prjónar og selur skó undir nafninu Álfaskór. Skórnir, sem flestir nota sem inniskó, eru handprjónaðir úr íslenskri ull og þæfðir. Litskrúð einkennir þá en álfar eiga einmitt að vera fyrir litrík og þægileg föt. Erfitt getur þó verið að læðast í skónum því bjalla er á uppbrettri tánni sem gerir þá enn skemmtilegri.
Bokkubrækur og hálsskraut
Ragnheiður er menntuð handavinnukennari og hefur alla tíð prjónað mikið. Hún er hætt að vinna og voru Álfaskórnir liður í að hafa eitthvað „lítið og sætt að gera í ellinni“, eins og hún orðar það. Það hefur þó aldeilis undið upp á sig og nú situr Ragnheiður við öllum stundum og prjónar og þæfir enda eftirspurnin eftir skónum næg. Framleiðslan hefur líka stækkað því hún gerir einnig töskur úr þæfðri ull og fiskroði og nýlega hóf hún að þróa skrautleg hálsmen úr ull. Þau vöktu lukku á nýafstaðinni Handverkshátíð á Hrafnagili þar sem Álfaskór voru með bás.Bokkubrækur er líka nýjung hjá Ragnheiði en um er að ræða prjónaðan gjafapoka utan um flöskur. „Mig vantaði umbúðir utan um gjöf, ég ætlaði að kippa með mér vínflösku í afmæli hjá umhverfissinna svo ég fékk þá hugmynd að það væri sniðugast að prjóna utan um flöskuna. Þetta gerði þvílíka lukku og umbúðirnar eru umhverfisvænar og hægt að nota aftur og aftur. Nafnið Bokkubrók kom svo frá góðum Skagfirðingi, mér fannst flöskupoki ekki nógu fallegt orð og hann stakk upp á Bokkubrók því þetta hafði verið kallað það þegar farið var með nesti á engjarnar á hans heimili.“
Ragnheiður lætur þetta þó ekki duga sér því yfir sumartímann er hún með handavinnukennslu fyrir ferðamenn á Hótel Laxnesi í Mosfellsbæ og yfir vetrartímann er hún með helgarnámskeið í handavinnu í Borgarnesi.