Það virðist ganga betur að ná sambandi við Bretland en Efstaleiti. RÚV heyrir ekki bænir manns um að Síðasta lag fyrir fréttir verði fært aftur á sinn rétta stað. Handritshöfundur Downton Abbey uppfyllir hins vegar bón sem lögð var fram í þessum litla dállki fyrir einhverjum mánuðum þess efnis að George Clooney fengi að skreyta þættina með sinni fögru návist. Nú hefur semsagt verið tilkynnt að hann komi fram í jólaþætti Downton. Þetta verður örugglega besta jólagjöfin í ár.
Ef RÚV vill gleðja hlustendur sína væri ráð að planta Síðasta lagi fyrir fréttir á sinn stað, svona rétt fyrir jól. Þá væri RÚV virkilega komið í samkeppni við Downton Abbey um bestu jólagjöfina. Yfirmenn RÚV vonast örugglega til að aðdáendur Síðasta lagsins muni smátt og smátt sætta sig við breytingarnar en svo er ekki. Hér eru á ferð harðskeyttir aðdáendur sem geta ekki sætt sig við breytingar á útsendingu á laginu sínu. Sú sem þetta skrifar er hætt að heyra hádegisfréttir RÚV. Sálarlífið þolir ekki glamur-auglýsingastefin sem flutt eru rétt á undan fréttum og sleppir því alveg að hlusta. Það verður hins vegar horft á Downton.
Kolbrún Bergþórsdóttir
Til baka
Leita í greinasafni
Prenta grein
