Húnn Snædal skrifaði til gamans á jólakort fyrir 30 árum:
Á þessum jóla darradans
dálítið er ég lúinn
ég hlakka því til þrettándans
þá eru jólin búin.
Hetjutenórarnir héldu norður og sungu í Hofi á Akureyri. Ármann Þorgrímsson orti:
Hátíðarstund í Hofi var
heimsóttu okkur snillingar.
Tóku þar lagið tenórar
táruðust allar kellingar.
Gústi Mar bætti um betur:
Æpir tenór ofurhátt
alveg blár í framan.
Svo Eyfirðingar eiga bágt
allir gráta saman.
Davíð Hjálmar Haraldsson hafði orð á því á Leirnum á laugardaginn að hann hefði séð í Bændablaðinu að Kótelettufélag togarajaxla vildi að sauðfé yrði kynbætt til að af því fengjust fleiri kótelettur. – „Góð hugmynd hjá þeim félögum,“ segir hann.
Jaxlarnir sem eru á
úthafsveiðidollunni
heimta nú að hafa þrjá
hryggi á sömu rollunni.
Sigurlín Hermannsdóttir hafði lög að mæla þegar hún gerði þessa athugasemd: „Ef farið er út í að endurbæta rollurnar er eins gott að gera það almennilega.
Umbreytt fyrir ofan þind,
úrvals tækifæri,
og gott að hafa á hverri kind
kannski átta læri.“
Og Gústi Mar. var með á nótunum:
Ána hanna ætti svo
að ekki skorti kviðum.
Hefði skjátan hausa tvo
og helming meira af sviðum.
Ármann Þorgrímsson slær á létta strengi. Lagboðinn er „Jólasveinar einn og átta“:
Alþingismenn allir saman
aftur vitja stólanna
eru þykkri ögn að framan
eftir veislur jólanna.
Ekki finnst þó öllum gaman
óttast stöðu skjólanna
lítið skilja læknadramann
og leiðist nöldur skólanna;
Og hringt er ekki í Hólakirkju
helgum bjöllum sjólanna.
Jón Arnljótsson er á þjóðlegum nótum:
Ef þú ljóða listir kannt,
lofar fljóðin ungu,
er þá sjóði orða vant
ei á þjóðar tungu.
Halldór Blöndal
halldorblondal@simnet.is