Þriðja tap Stólanna í vetur

Þórsarar frá Þorlákshöfn byrja nýja árið vel í Dominos-deild karla í körfuknattleik. Þeir unnu í gærkvöldi Tindastól 97:95 og er það aðeins þriðja tap Skagfirðinga í deildinni í vetur.

Tómas Heiðar Tómasson var stigahæstur með 24 stig en Grétar Ingi Erlendsson var með 20 og tók 9 fráköst. Darrel Lewis skoraði 32 stig fyrir Stólana og tók 14 fráköst og Helgi Freyr Margeirsson var með 21 stig. Sú magnaða staða er uppi í deildinni að liðin í 4.-8. sæti eru öll með 14 stig og er Þór í þeim hópi. Tindastóll er hins vegar með 20 stig í 2. sæti, sex stigum á eftir toppliði KR en fjórum á undan Stjörnunni.

Snæfell kom nokkuð á óvart og vann öruggan útisigur á Haukum, 97:77. Með sigrinum komst Snæfell upp að hlið Hauka með 14 stig en Hafnfirðingar byrjuðu deildakeppnina af nokkrum krafti fyrr í vetur. Landsliðsmaðurinn Sigurður Þorvaldsson var öflugur fyrir Snæfell með 23 stig, 6 fráköst og 5 stoðsendingar. Austin Magnus Bracey var stigahæstur með 25 stig. Hjá Haukum var Alex Francis mjög atkvæðamikill með 38 stig og 15 fráköst en það dugði ekki til.

Jón Axel styrkir Grindvíkinga

Skallagrími og Fjölni tókst ekki að ná sér í stig í fallbaráttunni. Skallagrímur tapaði heima fyrir Grindavík 80:95 og Fjölnir tapaði í Njarðvík 91:82. Njarðvík er í þeim hópi sem er með 14 stig en Grindavík hefur 10. Skallagrímur og Fjölnir eru með 4 stig eins og ÍR í 10.-12. sæti.

Stefan Bonnea hefur komið af krafti inn í lið Njarðvíkur og hann skoraði 28 stig en hjá Fjölni varð Jonathan Mitchell stigahæstur með 24 stig.

Jón Axel Guðmundsson hefur styrkt Grindavíkurliðið verulega eftir að hann kom heim frá Bandaríkjunum um áramót. Hann gerði 23 stig í Borgarnesi en Tracy Smith Jr. 25 fyrir Skallagrím og nýi maðurinn, Magnús Gunnarsson var með 24.