Meistaraþef leggur yfir Vesturbæinn

Í Vesturbæ

Andri Yrkill Valsson

yrkill@mbl.is

Það er líklega sárt að vera ÍR-ingur í dag. Tap liðsins gegn KR í Dominos-deild karla í körfuknattleik í gærkvöldi mun eflaust svíða áfram fram yfir helgi. Eftir að hafa verið yfir allan leikinn og spilað á köflum glimrandi körfubolta þurftu ÍR-ingar að játa sig sigraða, en þó þurfti tvær framlengingar til, 113:110.

KR-ingar virkuðu hálfáhugalausir og kannski steig það þeim til höfuðs að andstæðingurinn var í fallsæti fyrir leikinn. Allavega var eitthvað sem var ekki í lagi í hausnum á mönnum, en það má ekki taka neitt af Breiðhyltingum sem mættu með kassann út frá fyrstu mínútu; óhræddir við taplausa Vesturbæinga.

ÍR-ingar voru agaðir í vörninni og neyddu meistarana í erfið skot sem geiguðu oftar en ekki í fyrri hálfleik. Á meðan voru Breiðhyltingar hreyfanlegir í sókninni og virtust alltaf finna lausar skyttur fyrir utan. Ef ekki, þá var einfaldlega bara keyrt á vörnina. Ekki flókið og verðskulduð sextán stiga forysta í hálfleik. Eins og við var að búast bjuggu KR-ingar sig undir áhlaup eftir hlé, en þeir bláklæddu stóðust það vel. Þristur frá Brynjari Þór tryggði KR framlengingu, en meistararnir komust ekki yfir í leiknum fyrr en í henni. Brynjar sjálfur viðurkenndi eftir leikinn að einfaldlega hefði verið um rán að ræða. Allavega er það rannsóknarefni.

ÍR-ingar hafa verið gríðarlega seinheppnir í vetur og þrátt fyrir að þeir spili oft vel detta hlutirnir ekki fyrir þá. Það virðist þó ekki vera skortur á sjálfstrausti í Breiðholtinu og menn hengja ekki haus, sem er vel. Þessi taphrina tekur þó eflaust á sinnið, þar sem yfirleitt er mjótt á munum. KR-ingar eru þó suddalega seigir og endurkoma þeirra í gær bar brag meistara. Það er erfitt að halda einhverju öðru fram.