Borgarráðsfulltrúar Sjálfstæðisflokksins halda því fram að ný úttekt sem Intellecta vann fyrir innri endurskoðun Reykjavíkurborgar um sameiningu skóla sé áfellisdómur yfir öllu sameiningarferlinu. Úttektin á stofnun skóla- og frístundasviðs borgarinnar og sameiningu grunnskóla var lögð fram í borgarráði í gær. Fulltrúar meirihlutans líta öðrum augum á úttektina og segja margt fá þar góða einkunn þótt alvarlegar athugasemdir séu gerðar við samráðsskort.
Í bókun fulltrúa Sjálfstæðisflokksins segir að í úttektinni sé í einu og öllu tekið undir gagnrýni borgarfulltrúa Sjálfstæðisflokksins á sameiningu skóla. „Rauði þráðurinn í skýrslunni er að samráð var algjörlega ófullnægjandi auk þess sem skorti framtíðarsýn og faglegar og fjárhagslegar forsendur. Í sem skemmstu máli fær sameiningarferlið, undirbúningur og framkvæmd verksins falleinkunn,“ segir þar.
Miklar deilur urðu um sameiningu grunnskóla á höfuðborgarsvæðinu á sínum tíma, sem meirihluti Besta flokksins og Samfylkingarinnar réðst í á síðasta kjörtímabili.
Meirihluti Samfylkingar, Bjartrar framtíðar, Vinstri-grænna og Pírata bókaði á móti á borgarráðsfundinum í gær að þeir flokkar sem stæðu að nýjum meirihluta sem áttu á þessum tíma sæti í borgarstjórn hefðu ekki verið samstiga í afstöðunni til skólasameininga á síðasta kjörtímabili. Núverandi meirihluti væri hins vegar sammála um það mat að skýrslan bæri með sér að í verkefninu hefði margt verið vel gert og fengi góða einkunn en gerðar væru alvarlegar athugasemdir við mikilvæga þætti, ekki síst þá sem lytu að samráði við hagsmunaaðila og skorti á pólitískri samstöðu.
Til baka
Leita í greinasafni
Prenta grein
