Agnarlítill spörfugl, sem vegur ekki meira en þrjár teskeiðar af sykri, getur flogið allt að 2.770 kílómetra leið yfir Atlantshafið án viðkomu á landi, að sögn vísindamanna sem hafa rannsakað farflug fuglsins.
Spörfuglinn nefnist rákaskríkja ( Setophaga striata ), vegur aðeins 12 grömm og flýgur á hverju hausti frá varpstöðvunum í norðausturhluta Bandaríkjanna og Kanada til Suður-Ameríku þar sem hann hefur vetursetu.
„Okkur þykir mjög spennandi að geta skýrt frá því að þetta er ein af lengstu farflugleiðum spörfugla yfir hafi án viðkomu á leiðinni. Niðurstöður okkar staðfesta loksins það sem talið hefur verið eitt af mestu flugafrekum fugla á jörðinni,“ sagði Bill DeLuka, líffræðingur við Massachusetts-háskóla.
Fuglafræðingar höfðu lengi deilt um hvort rákaskríkjan flygi beint yfir hafið eða hefði viðkomu á landi til að hvíla sig. Vísindamennirnir settu farflugsrita, sem vegur hálft gramm, á 40 rákaskríkjur og í ljós kom að þær flugu 2.270 til 2.770 kílómetra yfir hafið frá varpstöðvunum í Vermont og Nova Scotia til Stóru Antillaeyja, m.a. Kúbu og Púertó Ríkó, þar sem þær höfðu viðkomu. Þaðan flugu þær síðan til Venesúela og Kólumbíu.
Skýrt er frá rannsókninni í tímaritinu Biology Letters .
Til baka
Leita í greinasafni
Prenta grein
