Aldís Katrín Guðlaugsdóttir

Það er erfitt að kveðja þig litla systir.

En eftir erfiða baráttu í mörg ár er kominn tími á þína hvíld. Við gerðum margt gott saman Aldís, unnum saman í prentsmiðju Ísafoldar og svo lá leið okkar á DV.

Svo fluttir þú með strákana til Grindavíkur, það voru góðir tímar; að sjálfsögðu unnum við saman þar líka og áttum þar frábærar stundir. Gaman er að rifja upp allar útilegurnar sem við fórum í saman með fjölskyldum okkar.

Alltaf gat maður stólað á þig ef það vantaði eitthvað, þú varst mamman í hópnum og reddaðir öllu.

Manstu ferðalagið okkar frá Svíþjóð og niður til Ítalíu og það sem við lentum í þar. Á leiðinni stoppaði lögreglan okkur og lentum við í alls konar veseni. Þetta er tími sem ég mun aldrei gleyma. Bústaðarferðirnar okkar, Aldís, með fjölskyldu og vinkonum voru ógleymanlegar. Það var svo frábært þegar þið fluttuð til Grindavíkur, ég dró þig í slysavarnafélagið Þórkötlu og þar var nú oft gaman, t.d. þegar við vorum að selja nammi um sjómannahelgina á bryggjunni.

Ekki má nú gleyma ferðunum okkar í Þórsmörk og Kerlingarfjöll, þar var hlegið alla helgina út í eitt og við skemmtum okkur svakalega vel. Það verður skrítið að fara núna án þín, elsku Aldís, í þessar ferðir. Núna trúi ég því að þú sért komin á góðan stað og líðir vel. Þetta er búin að vera erfið og löng barátta en þú stóðst þig eins og hetja allan tímann, það eru forréttindi að eiga þig sem systur, kæra Aldís.

Takk fyrir allt, elsku systir, ég votta Ívari, Antoni og Hlyni mína dýpstu samúð á þessum erfiðu tímum.

Kær kveðja,

Þú kvaddir okkur svo allt of snemma, eftir hetjulega baráttu þína við illvígan sjúkdóm sem sigraði að lokum. Eftir sitjum við með sorg í hjarta og söknuð eftir einstaklega yndislegri, glaðværri og kærleiksríkri konu sem gaf svo mikið af sér. Full af bjartsýni og jákvæðni í gegn um öll þín veikindi barðist þú og sýndir okkur að það þýðir ekkert að gefast upp, ekkert er búið fyrr en það er búið. Ég dáist að eljusemi þinni og krafti, þú varst hetja af guðs náð.

Elsku kæra vinkona mín, þín er sárt saknað og minning þín mun lifa áfram í hjarta mér um ókomna tíð.

Elsku Ívar, Hlynur, Anton, Alla, Laugi og aðrir aðstandendur, við fjölskyldan biðjum góðan guð að veita ykkur styrk í sorg ykkar á þessum erfiðu tímum.

Hvíl í friði, elsku yndislega Aldís mín.

Þín vinkona,