Íslenska félagið Bláfugl, Bluebird Cargo, hefur gert samstarfssamning við Emirates Sky Cargo um flugfragt milli Íslands og 100 borga um allan heim.
Í tilkynningu frá Bluebird segir að Emirates Sky Cargo sé stærsta fragtflugfélag heims og að með samningum verði hægt að bjóða íslenskum inn- og útflytjendum að tengjast flugneti Emirates í Dublin á Írlandi
Bluebird flýgur til Dublin hvern virkan dag en Emirates flýgur tvisvar á dag milli Dublin og Dubaí á Boeing 777 breiðþotu. Flugvöllurinn í Dubai er tengiflugvöllur Emirates til 144 áfangastaða í 81 landi.
Magnús H. Magnússon segir samstarfið bjóða upp á nýja flutningsmöguleika á hagstæðum kjörum og hægt að tryggja góða vörumeðhöndlun alla leið. Er þannig hægt að tryggja ákveðið hitastig sendingar allt á áfangastað fyrir flutninga á fiski, lyfjum og grænmeti.
Bluebird Cargo á nú þegar í samstarfi við UPS Cargo og Aer Lingus. Með samningnum við Emirates Sky Cargo er ekki hvað síst verið að styrkja tengingar við áfangastaði í Asíu, Afríku og Eyjaálfu. ai@mbl.is