Benedikt Bóas
benedikt@mbl.is
„Skipverjar ná ekkert að gera, koma engu í gang og það er trúlega óþægilegt að vita ekki hvar maður lendir,“ segir Bergur Þór Eggertsson, aðstoðarframkvæmdastjóri Nesfisks, útgerðarfélags Gottlieb 2622 sem strandaði við Hópsnes á Reykjanesi á miðvikudag.
Vélarbilun varð um borð í bátnum og vindurinn, sem var töluverður, lét bátinn reka hratt að klettunum við Hópsnes.
„Þetta gerist mjög snöggt,“ segir Bergur en skipverjar urðu eðlilega skelkaðir og voru ekki í neinu ástandi til að veita viðtal um atburðinn.
Fjórir voru um borð og komust skipverjar allir í flotgalla. Eftir að báturinn steytti á skeri komust skipverjar af sjálfsdáðum frá borði og óðu upp í fjöru. Þyrla Landhelgisgæslunnar kom skömmu síðar og ferjaði mennina til Grindavíkur.
Skipverjar á bátnum Gulltoppi brugðust við neyðarkalli frá Gottlieb og voru komnir að honum um 10 mínútum síðar. Þeir reyndu að koma taug í bátinn sem var heldur of stutt og grönn og slitnaði hún. Rak því bátinn hratt að klettunum.
Bergur segir að báturinn standi nú í klettunum en gerð verði tilraun í dag til að ná í hann á stórri beltagröfu.
„Það verður gerð tilraun ef leyfi fæst frá Umhverfisstofnun, þeir ráða hvort það megi fara með beltagröfu þangað niður eftir og taka bátinn. Þeir tóku sér frí á uppstigningardag og það gerum við líka.“