Ísland í veigamiklu hlutverki í Sense8

Það dylst engum að náttúra Íslands er stórbrotin og er orðin efniviður margra leikstjóra og kvikmyndagerðarmanna sem leita út um allan heim að áhugaverðum tökustöðum. Í nýrri þáttaröð Netflix, Sense8, fær Ísland sannarlega að njóta sín og gaman að sjá hve margir fallegir staðir eru notaðir bæði í landslagi og byggingum. Fyrsti þátturinn grípur mann með hraðri atburðarás en langt í frá línulegri frásögn. Það er stokkið á sekúndubroti milli heimsálfa og milli persóna. Áhorfandinn verður að vera vel vakandi til að halda þræði þegar í einni svipan er skipt á milli litríkra Indverja í glaðlegum Bollywood-dansi yfir í hörkulegt kóreskt bardagaatriði þar sem markmiðið er að ganga frá andstæðingnum.

Ísland á sinn fulltrúa í þættinum í Riley, ungri konu sem fer úr sollinum í London á íslenskar heimaslóðir. Tónlistarmaðurinn og nú leikarinn KK tekur sig vel út í hlutverki föður Riley og sömuleiðis Lilja Þórisdóttir í hlutverki dularfullu konunnar Yrsu. Þá bregður Þorsteini Bachmann fyrir ásamt fleiri íslenskum leikurum. Ég horfði á alla 12 þættina og væri alveg til í að Netflix gerði framhald af Sense8.