Hallgrími Kristinssyni þykir ástandið ekki gott í heilbrigðismálum: Hann yrkir á laugardag:
Eitthvað um fjörutíu fæðingar,
fimmtíu og sex hjartaþræðingar
og eitt þúsund bráðablæðingar
bíða nú einkavæðingar.
Guðmundur Arnfinnsson sendi mér nokkrar línur á sunnudaginn: „Eiginlega á ég bara að senda þér gátur, en sendi til þín vísukorn í tilefni af lyktum verkfalls hjúkrunarstarfsfólks:
Vanda bráðum afstýrt er,
enginn veit þó, hvernig fer,
Kristján eins og Kristur ber
krossinn þunga´ á herðum sér.“
„Frelsun geirvörtunnar“ hefur eðlilega orðið hagyrðingum vinsælt yrkisefni á Leirnum. Gústi Mar byrjaði:
Alþingi er allt í hvelli,
ekki linnir róstunum.
En yndislegt á Austurvelli
er hjá meyjabrjóstunum.
Þá barst kveðja að norðan og Friðrik Steingrímsson lét í sér heyra:
„Löggan kölluð til vegna manns sem beraði á sér kynfærin í Austurstræti.
Óáreitt með brjóstin ber
brosleit sprangar gellan,
í varðhald körlum vísað er
sem viðra á sér sprellann.“
Og „úr Austurstræti“ orti Ármann Þorgrímsson:
Illar fréttir eru héðan
ekkert kynja jafnræði
einhver sem fór úr að neðan
óðar sætti harðræði.
Og enn bar það til tíðinda, að Ríkisútvarpið skýrði frá því á sunnudag, að „nakti maðurinn á Austurvelli í gær var á vegum Félags íslenskra bifreiðaeigenda og reyndist alls ekki nakinn. Hann var klæddur í húðlitan galla og hjólaði um á Austurvelli en verið var að taka upp auglýsingu á vegum FÍB.
MBL greinir frá þessu en í gær sendi lögregla frá sér tilkynningu um að maður hefði berað kynfæri sín á samkomu berbrystinga á Austurvelli. Þar fagnaði fólk frelsi geirvörtu kvenna.“
Af þessu tilefni orti Davíð Hjálmar Haraldsson:
Allir kvenmenn; grannir, svartir, sverir,
sýnast mega hlaupa um klæðum flettir
en karlar þeir sem þykjast vera berir
þegar eru í hand- og fótjárn settir.
Halldór Blöndal
halldorblondal@simnet.is
Til baka
Leita í greinasafni
Prenta grein
