Handknattleiksþjálfarinn Erlingur Richardsson og hornamaðurinn Bjarki Már Elísson hafa svo sannarlega fengið fljúgandi start með sínu nýja félagi, Füchse Berlín. Þeir hrósuðu í gær sigri í heimsbikar félagsliða í Katar og lögðu þar Aron Pálmarsson og samherja hans í ungverska stórliðinu Veszprém, 28:27, í framlengdum úrslitaleik.
Auk þess að fá titilinn heimsmeistari félagsliða 2016 fékk Füchse ávísun upp á 400 þúsund evrur, eða tæpar 58 milljónir íslenskra króna, sem voru sigurlaunin í keppninni.
Bjarki Már, sem tryggði Füchse sigur á Evrópumeisturum Barcelona í undanúrslitunum, skoraði tvö mörk, bæði úr vítaköstum, og gerði þau með stuttu millibili í fyrri hálfleiknum. Aron gerði eitt mark, jafnaði metin í 24:24 þegar fjórar míútur voru eftir, og það voru líka lokatölur venjulegs leiktíma.
Kent Robin Tönnesen var hetja Füchse í framlengingunni þar sem hann skoraði þrjú af fjórum mörkum Berlínarrefanna. Hann var markahæstur með 6 mörk. Renato Sulic gerði 8 mörk fyrir Veszprém.
Füchse vann sér keppnisrétt á mótinu með því að verða EHF-meistari í vor, þá undir stjórn Dags Sigurðssonar. Füchse er fyrsta þýska liðið í fjögur ár sem vinnur keppnina en Barcelona hafði unnið tvö undanfarin ár.
Guðjón Valur Sigurðsson skoraði 3 mörk fyrir Barcelona sem vann auðveldan sigur á Sydney University frá Ástralíu, 30:20, í leiknum um bronsverðlaunin.
Til baka
Leita í greinasafni
Prenta grein
