Borgarstjórn Reykjavíkur samþykkti á fundi sínum í gær að fela skrifstofu borgarstjóra í samvinnu við innkaupadeild að undirbúa og útfæra sniðgöngu Reykjavíkurborgar á ísraelskum vörum á meðan hernám Ísraelsríkis á landsvæði Palestínumanna varir. Björk Vilhelmsdóttir, fráfarandi borgarfulltrúi Samfylkingarinnar, lagði fram tillögu þessa efnis sem var samþykkt með atkvæðum Samfylkingar, Bjartrar framtíðar, Pírata og VG.
Í bókun borgarfulltrúa Sjálfstæðisflokksins eftir fundinn segir að þeir taki eindregna afstöðu gegn mannréttindabrotum hvar sem þau séu framin í heiminum. „Ekki er þó hægt að taka undir þá tillögu sem fyrir liggur enda ekki sannfærandi rök um að inngrip af þessu tagi skili miklum árangri. Innkaupabann mun engin áhrif hafa í Palestínu. Allra síst mun innkaupabann á vörur frá Ísrael í Reykjavíkurborg hafa áhrif á stöðu íbúa Palestínu til hins betra. Reynslan sýnir að slíkar aðgerðir loka á samskipti og útiloka farsælar lausnir,“ segir í bókuninni.