Skúli Pálsson, heimspekingur, kennari og hagyrðingur, auglýsir á Boðnarmiði ljóðabók sem hann er með í smíðum: „Vísur fyrir þig sem ert í góðu skapi og líka fyrir þig sem ert dapur. Vísur fyrir þau sem eru ástfangin og hin sem eru í ástarsorg. Þær hafa orðið til af mismunandi tilefnum en vilja standa allar saman í einni bók. Bók undir áhrifum frá íslenskum rímum og japönskum hækum.“
Hann segist hafa sett sér það verkefni að búa til eina vísu á dag í eitt ár. – „Upphaflega átti það að vera æfing í sjálfsaga og þjálfun í að fara með stuðla og höfuðstafi. Svo vildu vísurnar fara sínar eigin leiðir og sumar vildu raða sér saman í ljóð. Og nú vilja þær standa saman í bók og fá fleiri til að lesa sig,“ segir hann. Bókin á að skiptast í fjóra kafla eftir árstíðunum – „stundum eru ljóðin léttúðug, stundum reyna þau að horfa inn í kjarna tilverunnar“.
Æviskeið
Litlu krakkakrílin fá
kunna orð að mæla,
angur sitt og óskir tjá
einatt með að skæla.
Táningarnir tjútta og
af tómri kæti hoppa,
viðstöðulaus vöðvaflog
vonlaust er að stoppa.
Þó að lengi þetta sker
þjaki vondsleg kreppa
allra sinna ferða fer
fullorðinn á jeppa.
Þegar er í lífsins lind
löggin næstum búin
öldungur með göngugrind
gaufar áfram lúinn.
Sumarvísa
Í dag er alveg brjáluð blíða,
börnin úti skoppa víða,
lifnar óðum lauf á trjánum,
leik ég mér og veifa tánum.
Kynningarvísa
Skúli Pálsson skáldið er,
skemmtilega yrkir,
yður býður kvæðakver,
Karólína styrkir.
Þetta verður vafalaust áhugaverð bók og skemmtilegt nýnæmi, að bókin er boðin með mismunandi kjörum eftir því hvort hún er árituð eða frumort vísa eða ljóð fylgir.
Í Hugsvinnsmálum segir:
Mikið vatn
gerir mörgum skaða,
þótt falli eigi straumar strítt;
svo er seggur
slægur og langþögull,
þörf er við þeim að sjá.
Halldór Blöndal
halldorblondal@simnet.is