Blessuð börnin kunna flest afskaplega vel við að fá að fara á bókasafn og njóta þess sem þar er í boði, hvort sem það eru bækurnar eða eitthvað annað. Umhverfið er örvandi og alltaf eitthvað skemmtilegt að sjá. Borgarbókasafnið býður upp á ýmsa viðburði allt árið um kring og í dag er margt skemmtilegt á ólíkum söfnum borgarinnar. Í dag kl. 14-16 í aðalsafni Borgarbókasafnsins í Tryggvagötu verður boðið upp á smiðju fyrir börn sem er kölluð „Skemmtilegir skógar, dagur lítilla málara.“ Það fá börnin meðal annars tækifæri til að feta í fótspor listmálarans Pekka Halonen og skapa sína eigin list með innblæstri frá skógunum. Fjölbreyttur efniviður verður í boði á staðnum. Dagskrá dagsins inniheldur leiðsögn við skapandi vinnu þar sem ímyndunaraflið fær að njóta sín. Sigurbjörg „Sibba“ Karlsdóttir verður einnig á staðnum og segir börnunum heillandi sögur um töfra og leyndardóma skóganna. Frásögnin verður bæði á íslensku og ensku eftir þörfum.
Börn eru beðin um að koma með tómar mjólkurfernur eða annað áþekkt sem notað verður til að byggja fuglahús. Allt annað efni fyrir smiðjuna verður í boði á staðnum. Smiðjan skemmtilegir skógar, er hluti af sýningunni Í íslensku skógunum sem stendur yfir á Reykjavíkurtorgi, sýningarsal í Grófinni frá 21-27. september. Sýningin og smiðjan eru opnar almenningi og ókeypis aðgangur.
Í bókasafninu í Sólheimum er Ljúfur laugardagur síðasta laugardag í mánuði kl. 11-12. Þá er boðið upp á föndur, spil eða annað skemmtilegt sem börn og fjölskyldur þeirra geta dundað sér við saman. Markmiðið er að búa til notalega umgjörð um sameiginlega stund þar sem sköpunargleðin ræður ríkjum. Í dag verður boðið upp á klippiljóð. Safnið býður upp á orðin og pappírinn en þátttakendur leggja fram sköpunarkraftinn og hugvitssemina. Klippiljóðin henta krökkum sem eru byrjuð að lesa, en pappír og litir verða fyrir yngri börn.
Í bókasafninu í Spönginni verður krakkabingó í dag kl. 14. Allir eru hvattir til að taka þátt í hinu sívinsæla bingói með fjölskyldunni eða góðum vinum. Skemmtilegir vinningar fyrir þá sem hafa heppnina með sér. Bingódagarnir eru sívinsælir og nokkrir slíkir á dagskrá í menningarhúsum Borgarbókasafnsins í haust. Fylgist með á vefsíðunni: