Þrettán nemendur sem stundað hafa hálfs árs nám við Landgræðsluskóla Háskóla Sameinuðu þjóðanna voru brautskráðir í síðustu viku. Markmið skólans er að byggja upp færni sérfræðinga frá þróunarlöndum í landgræðslu, umhverfisstjórnun og sjálfbærri landnýtingu. Þetta er gert með því að þjálfa sérfræðinga sem starfa við landgræðslu- og landnýtingarmál í samstarfslöndum í Afríku og Mið-Asíu.
Í ávörpum við útskrift var lögð áhersla á mikilvægi landgræðslu og sjálfbærrar landnýtingar í baráttunni gegn landeyðingu og vísað í því samhengi í ný alþjóðamarkmið SÞ um sjálfbæra þróun sem verða samþykkt á allsherjarþingi SÞ í lok þessa mánaðar.
Nemarnir sem útskrifuðust frá Landgræðsluskólanum í ár koma frá Eþíópíu, Gana, Mongólíu, Úganda, Malaví, Namibíu og Kirgistan; sjö konur og sex karlar. Skólinn leggur mikla áherslu á að þjálfa bæði karla og konur og að flétta kynjajafnrétti inn í námið enda er það ein forsenda sjálfbærrar þróunar, sem endurspeglast í markmiðum SÞ.
Landgræðsluskólinn hefur starfað frá árinu 2007 og standa Landbúnaðarháskóli Íslands og Landgræðsla ríkisins að rekstri skólans.
sbs@mbl.is