Síðasta gáta var sem endranær eftir Guðmund Arnfinnsson:
Við bakstur mælieining er.
Oss hann fyrir gjósti ver.
Nefnist klerkur norðanlands.
Notalegt er tárið hans.
Harpa á Hjarðarfelli svarar:
Bolli mælieining er
og í bolla skýli mér.
Bolli kunnur klerkur hér.
Kaffibolli yljar þér.
Elvar Einarsson, Williamsburg, Virginíu, á þessa lausn:
Í bakstri mælir bollinn vel.
Í bolla skjól ég ágætt tel.
Séra Bolli sálma tónar,
súp' úr bolla fínni rónar.
Helgi Seljan leysir gátuna þannig:
Bolla af hveiti er bezt að hafa,
í bolla grónum ég skjólið fann.
Séra Bolli er sæll án vafa,
„soldið“ kaffitár hressir mann.
Helgi R. Einarsson svarar:
Ég klóraði mér í kolli,
hvað sem að því nú olli,
hætti svo dundi og drolli,
á daginn kom þá bolli.
Sjálfur leysir Guðmundur gátuna þannig:
Bolli af sykri, bolli af hveiti.
Bolli oss fyrir gusti ver.
Bolli klerks er kunnugt heiti.
Kaffi úr bolla drukkið er.
Og lætur limru fylgja:
Þeir telja, að Bolli bakari
sé betri maður og spakari
en hárskerinn Geir,
en hitt vita þeir,
að hárskerinn Geir er rakari.
Og loks er ný gáta eftir Guðmund:
Afrek vinnur öðrum fremur.
Aðeins lítill skammtur víns.
Oft í ljós á lofti kemur.
Ljós í enni Blesa þíns.
Svör þurfa að berast eigi síðar en á miðvikudagskvöld.
Mér finnst hlýða að ljúka Vísnahorni með stöku sem Jóhann frá Flögu kenndi mér á sokkabandsárum mínum á Laugaveginum:
Kaffibolla beindu mér
blíð og holl gulls eikin
því að hrollur í mér er
eftir skollaleikinn.
Halldór Blöndal
halldorblondal@simnet.is