Citroën hefur ákveðið að smíða sinn fyrsta rafbíl en óhætt er að segja að hann sé heldur óvenjulegur – eins og svo margur annar bíllinn sem komið hefur frá Citroën um dagana.
Eiginlega er um að ræða smíðisútgáfu Cactus M-hugmyndabílsins, tvennra dyra blæjubíls, sem sló í gegn á bílasýningunni í Frankfurt í haust. Ber hann nafnið E-Mehari og var formlega kynntur í París í síðustu viku.
Franski bílsmiðurinn hefur teflt fram rafbíl undanfarin ár, C-Zero, en þar hefur eiginlega fremur verið um að ræða rafbílinn Mitsubishi i-MiEV í frönskum fötum.
Að sögn Citroën hefst raðsmíði E-Mehari á nýju ári og munu fyrstu fjöldaframleiddu eintökin renna af færiböndum bílsmiðju fyrirtækisins í Rennes á Bretaníuskaganum í Frakklandi næsta vor. Ekki er þó búist við að hann muni seljast í miklu magni og hér sé fremur bíll sem menn telji dýrðarljóma stafa af og kaupi hann sem slíkan.
Hámarksafl E-Mehari verður 50 kílóvött eða 67 hestöfl og hámarkshraði 110 km/klst. Mun hann því ekki ná hámarkshraða franskra hraðbrauta, sem er 130 km/klst. Drægi bílsins verður 200 km og hann verður tæpast til langferða mikið brúkaður því taka mun heilar átta klukkustundir að hlaða tóma 30 kílóvatta LMP-rafhlöðuna. Og þótt hugsaður sé meðal annars til fjöruferða kemst E-Mehari ekki niður að sjó frá París og til baka á einni geymisfylli rafmagns.
Yfirbygging E-Mehari er úr sterku hitamótuðu plastefni og því þarf ekki að óttast ryðmyndun í henni. Hinar mjúku og vingjarnlegu línur yfirbyggingarinnar virka nútímalegar. Innréttingin er svo úr efnum sem þola mislynd veður.
Því er ekki að neita, að nýi bíllinn minnir að nokkru á annan bíl með sama nafni frá Citroën, Mehari, sem smíðaður var um tveggja áratuga skeið, 1968-88.
agas@mbl.is
Til baka
Leita í greinasafni
Prenta grein
