Dagur B. Eggertsson borgarstjóri og Óli Gneisti Sóleyjarson þjóðfræðingur festu í gær upp skiltið Svarthöfða á gatnamótum þessarar nýju götu við Stórhöfða.
Óli Gneisti setti hugmyndina, að kenna götu við persónu úr Star Wars, á vefinn Betri Reykjavík og hlaut hún þar mikið fylgi. Málinu var vísað til byggingarfulltrúans í Reykjavík sem hefur með nafngiftir gatna að gera og gerði hann að tillögu sinni að breyta heiti Bratthöfða, sem liggur milli Sævarhöfða og Stórhöfða, í Svarthöfða.
Byggingarfulltrúinn í Reykjavík benti á í rökstuðningi með tillögunni að engin fasteign væri skráð við götuna og það myndi því ekki hafa áhrif á rekstur fyrirtækja. „Það getur verið við hæfi að nefna hluti í umhverfinu eftir nafntoguðum fyrirbærum hvers tímabils í sögu mannkyns, hvort sem er uppdiktuðum eða raunverulegum. Mörg dæmi eru um það í nafngiftum gatna í Reykjavík að þær séu nefndar eftir skáldsagnapersónum og er því ekki úr vegi að nefna götu í Höfðahverfinu Svarthöfða,“ sagði meðal annars í umsögn byggingarfulltrúans.
Til baka
Leita í greinasafni
Prenta grein
