Viðar Guðjónsson
vidar@mbl.is
Reykjavíkurborg hefur samþykkt leyfisumsókn til byggingar húss á lóð Landspítalans við Hringbraut þar sem jáeindaskanni verður starfræktur. Að sögn Péturs Hannessonar, yfirlæknis röntgendeildar Landspítala, hefjast framkvæmdir næsta mánudag þegar jarðvinna byrjar. Búist er við að byggingu ljúki í sumarlok.
Í notkun næsta vetur
Starfsemin í húsinu mun hefjast um miðjan næsta vetur ef áætlanir standast. Að sögn Péturs er von á jáeindaskannanum til landsins í haust. Þá telur hann að ráða þurfi nokkra starfsmenn til að sinna starfseminni.Húsið sem mun rísa er rúmir 375 fermetrar. „Jáeindaskanninn er ekki svo stór en svo er heilmikil framleiðslueining sem verður í húsinu til þess að búa til ísótópa (geislavirkar samsætur), tilraunastofa til að búa til efnin og síðan er þetta allt saman notað í sjúklinginn. Svo þarf svæði fyrir sjúklinga og annað,“ segir Pétur. Hann segir að byggingin verði við spítalann og í tengslum við núverandi ísótópastofu hans.
Eins og fram hefur komið eru jáeindaskanninn og byggingin tilkomin fyrir tilstilli peningagjafar Íslenskrar erfðagreiningar upp á 5,5 milljónir dollara, eða sem nemur 726 milljónum króna. Bæði kaupin á jáeindaskannanum og hin nýja bygging eru fjármögnuð að fullu af gjafafénu.