Baldur Arnarson
baldura@mbl.is
Samningar voru undirritaðir í gær um uppbyggingu Vogabyggðar, hverfis sem afmarkast af Sæbraut, Kleppsmýrarvegi og Súðarvogi í Reykjavík. Áformað er að byggja 1.100 til 1.300 íbúðir á svæðinu
Fram kemur í tilkynningu frá Reykjavíkurborg að samningarnir nái til hluta Vogabyggðar, svæðis 2. Stærstu lóðarhafar þar eru sagðir Gámakó og Vogabyggð, dótturfyrirtæki Hamla, sem eru í eigu Landsbankans. Samtals ráði þessi fyrirtæki yfir 70% lóða á svæði 2.
Ásamt íbúðum er gert ráð fyrir 56 þúsund fermetrum af atvinnuhúsnæði. Reykjavíkurborg áætlar að kostnaður hennar af uppbyggingu skóla og allra innviða í hverfinu verði um 8 milljarðar króna. Verða byggðir leikskóli og grunnskóli.
Athygli vekur að í tilkynningu frá Reykjavíkurborg er ekki vikið að framkvæmdaáætlun vegna þessarar uppbyggingar.
Haft var eftir Hannesi Frímann Sigurðssyni, verkefnastjóri hjá Hömlum, í Morgunblaðinu 19. nóvember 2014 að uppbygging fyrsta áfanga hverfisins gæti hafist árið eftir, það að segja á árinu 2015.
Verkefnið hefur því tafist og herma heimildir blaðsins að ein ástæðan sé flækjustigið við að breyta svo grónu hverfi.