Stjórnvöld á Srí Lanka hafa ákveðið að undirrita svonefndan Ottawa-samning sem bannar að jarðsprengjur séu framleiddar, geymdar, fluttar eða notaðar. Verður jarðsprengjubirgðum þar í landi því eytt á næstunni, en sjö ár eru nú liðin frá lokum borgarastríðsins.
„Við ákváðum að undirrita Ottawa-samninginn vegna þess að við höfum ekki í hyggju að fara í stríð,“ hefur fréttaveita AFP eftir Harsha de Silva, aðstoðarutanríkisráðherra landsins. „Ákváðum við einnig að eyða birgðum okkar.“
Borgarastríðið á Srí Lanka stóð yfir í alls 37 ár og létust yfir 100.000 manns í átökunum. Frá lokum stríðsins hefur verið unnið að því að fjarlægja jarðsprengjur af gömlum vígvöllum. khj@mbl.is