Deildarmeistarar Hauka mæta Fylki í fyrstu umferð úrslitakeppninnar um Íslandsmeistaratitil kvenna í handknattleik og Grótta leikur gegn Selfossi.
Þetta varð endanlega ljóst eftir lokaumferð Olís-deildarinnar í gærkvöld þegar Selfoss vann FH, 26:23, og tryggði sér sjöunda sætið. Fylkir vann ÍR, 27:21, en hafnaði í áttunda sæti.
Þessi lið mætast í 8-liða úrslitum:
Haukar – Fylkir
Grótta – Selfoss
Fram – ÍBV
Stjarnan – Valur
Vinna þarf tvo leiki til að komast í undanúrslit en liðin sem talin eru upp á undan eiga heimaleikjarétt ef til þess kemur.
ÍBV vann Fram tvívegis í vetur
Fram hafði betur gegn Val í gærkvöldi og viðureign Fram og ÍBV verður athyglisverð. Þjálfari ÍBV, Hrafnhildur Skúladóttir, var jú lengi leikmaður hjá Stefáni Arnarsyni, þjálfara Fram, bæði í landsliðinu á árum áður og nýlega hjá Val. Stefán sagði við mbl.is í gærkvöldi að ÍBV væri sigurstranglegra liðið.„Mér líst mjög vel á það. Þær eru búnar að vinna okkur tvisvar í vetur þannig að það verður verðugt verkefni. Þær eru líklegri til að fara í undanúrslit, svo kemur bara í ljós hvað gerist,“ sagði Stefán.
Stjarnan fékk heimaleikjarétt
Bikarmeistarar Stjörnunnar höfnuðu í 4. sæti og tryggðu sér þar með heimaleikjarétt með öruggum útisigri, 31:23, á Akureyri í gær. Gamla kempan Hanna Guðrún Stefánsdóttir skoraði 10 mörk fyrir Stjörnuna í leiknum. Stjarnan mætir Val í 8-liða úrslitunum.
Deildirnar 2016-2017
Skipting kvennaliðanna í tvær deildir fyrir næsta tímabil er líka klár og var það reyndar fyrir lokaumferðirnar.Í úrvalsdeild leika Haukar, Grótta, Fram, Stjarnan, Valur, ÍBV, Selfoss og Fylkir.
Í 1. deild leika HK, Fjölnir, KA/Þór, ÍR, Afturelding og FH, ásamt þeim liðum sem mögulega myndu bætast við í meistaraflokki.