Mannanafnanefnd hefur samþykkt karlmannsnafnið Ugluspegil. Þórleifur Ásgeirsson óskaði eftir heimild nefndarinnar fyrir nafninu og
í samtali við Víkurfréttir sagði hann nafnið vera uppnefni sem hann hafi fengið í skóla og notað allar götur síðan.
Mannanafnanefnd segir í úrskurði sínum að nafnið Ugluspegill brjóti ekki í bága við íslenskt málkerfi og dæmi séu um að viðurnefni séu notuð sem mannanöfn. Vísað er til vísindavefs Háskóla Íslands þar sem segir að Till Ugluspegill hafi verið söguhetja í þýskri arfsögn frá miðöldum en hann hafi verið hrekkjalómur og prakkari. Taldi nefndin merkingu nafnsins ekki almennt þekkta og ekki mjög neikvæða eða niðrandi.
„Fjarlægur eða óviss möguleiki á því að nafn verði nafnbera til ama er ekki nóg til þess að hafna því. Eiginnafnið Ugluspegill verður því látið njóta vafans,“ segir í úrskurðinum. laufey@mbl.is