Á Skjálfanda Afli hefur yfirleitt verið góður á vertíðinni, m.a. á Skjálfandaflóa þar sem skipverjar á Mána ÞH 98 fengu góðan afla síðasta mánudag. 147 bátar hafa byrjað veiðar, en þeir voru 140 á sama tíma í fyrra.
Á Skjálfanda Afli hefur yfirleitt verið góður á vertíðinni, m.a. á Skjálfandaflóa þar sem skipverjar á Mána ÞH 98 fengu góðan afla síðasta mánudag. 147 bátar hafa byrjað veiðar, en þeir voru 140 á sama tíma í fyrra. — Ljósmynd/Þórður Birgisson
Ágúst Ingi Jónsson aij@mbl.is „Við höfum óskað eftir rökstuðningi ráðherra fyrir fjölgun daga á grásleppuveiðum og teljum hana varhugaverða,“ segir Örn Pálsson, framkvæmdastjóri Landssambands smábátaeigenda.

Ágúst Ingi Jónsson

aij@mbl.is

„Við höfum óskað eftir rökstuðningi ráðherra fyrir fjölgun daga á grásleppuveiðum og teljum hana varhugaverða,“ segir Örn Pálsson, framkvæmdastjóri Landssambands smábátaeigenda. Sjávarútvegsráðherra ákvað í vikunni að heimila veiðar á grásleppu í 32 daga, LS lagði til að dagarnir yrðu 26, en í upphafi vertíðar var miðað við 20 daga til bráðabirgða. Örn segist óttast að svo margir veiðidagar leiði til offramboðs, verðlækkunar og birgðasöfnunar. Útflutningsverðmæti grásleppuafurða, þ.e. hrogna og hveljunnar, nam um 2,3 milljörðum í fyrra.

Í frétt ráðuneytisins kemur fram að samkvæmt ráðgjöf Hafrannsóknastofnunar sé ráðlögð hámarksveiði á grásleppu 6.800 tonn á vertíðinni. Mikil óvissa sé ævinlega um aflabrögð við grásleppuveiðar, en vertíðin í ár fari afar vel af stað. Afli hafi verið góður og virkum grásleppuleyfum fjölgað lítillega milli ára. Ráðuneytið hafi því ákveðið að veiðidagar verði 32, jafnmargir og í fyrra. Þá veiddust um 6.400 tonn af grásleppu og segir á vef ráðuneytisins að dagafjöldinn nú sé miðaður við að lítil hætta sé á að heildarafli verði umfram ráðgjöf Hafrannsóknastofnunar.

Vandamál sem grásleppusjómenn mega síst við

Þessu er svarað á heimasíðu LS og segir þar að ákvörðunin valdi miklum vonbrigðum og telur LS að með henni verði veiði umfram eftirspurn, sem m.a. muni leiða til meiri verðlækkunar en orðin er og birgðasöfnunar. Vandamál sem grásleppusjómenn megi síst við.

LS telur að 26 veiðidagar hefði þurft til að ná veiði sem svari til 10 þúsund tunna. Það magn sé talið nægja til að koma á stöðugleika á markaðinn og snúa af braut verðlækkunar. Veiði á 6.800 tonnum af grásleppu gæti nægt til söltunar á 13 þúsund tunnum af grásleppuhrognum, segir á heimasíðu LS.

Örn Pálsson segir að verðið í ár hafi verið um 150 krónur fyrir heila grásleppu, eða um 25% lægra en í fyrra þegar það var um 200 krónur. Þótti það eigi að síður í lægri kantinum þá. Hann segir markaðinn mjög viðkvæman og allt mæli með því að reynt sé að draga úr framboði.

Grásleppusjómenn hafi metið stöðuna þannig að í heildina mætti verka um 20 þúsund tunnur af hrognum og sé þá miðað við að Íslendingar og Grænlendingar skiptu þeim afla nánast alfarið á milli sín. Í Nýfundnalandi og Noregi virðist ekki lengur vera áhugi á veiðunum vegna lágs verðs.