Markmenn í banastuði

Handbolti

Baldur Haraldsson

Víðir Sigurðsson

Ívar Benediktsson

Íslandsmeistarar Gróttu komust á laugardaginn í undanúrslitin á Íslandsmóti kvenna í handknattleik með því að sigra Selfoss öðru sinni, nú fyrir austan fjall, 23:21. Valur og Fram kræktu sér hinsvegar í oddaleiki sem fram fara í kvöld. Framkonur unnu öruggan fjögurra marka sigur á ÍBV í Vestmannaeyjum, 23:19, og Valur lék Stjörnuna grátt á Hlíðarenda og vann stórsigur, 25:17.

Það var mikið undir hjá Framkonum í Vestmannaeyjum, enda sumarfrí framundan ef tap væri niðurstaðan. Það sást frá byrjun að þær voru staðráðnar í því að knýja fram oddaleik. Varnarleikur liðsins var frábær allan leikinn og markvarslan ennþá betri. Guðrún Ósk Maríasdóttir varði 17 skot í marki Fram en liðsfélagi hennar Hafdís Lilja Torfadóttir var senuþjófur leiksins. Undir lok leiksins kom hún inná til að freista þess að verja vítakast. Það gerði hún og gott betur en það. Hún varði tvö víti í viðbót og sex af þeim átta sem hún fékk á sig í leiknum sem gerir 75% markvörslu.

Hjá ÍBV var sóknarleikurinn ansi stirður gegn flottri vörn Fram. Ester Óskarsdóttir átti góðan leik og gerði 9 mörk en Díana Dögg Magnúsdóttir 7 mörk. Að þær tvær geri 16 af 19 mörkum ÍBV er klárlega áhyggjuefni fyrir oddaleikinn í kvöld. Sterka pósta vantar í lið ÍBV en þær Vera Lopes og Greta Kavaliauskaite eru meiddar og koma líklega ekki meira við sögu á tímabilinu. Leikmenn eins og Drífa Þorvaldsdóttir og Telma Amado verða að stíga upp í kvöld ætli ÍBV sér einhverja hluti. Markvarsla ÍBV var aftur á móti frábær en Erla Rós Sigmarsdóttir varði 18 skot í marki liðsins.

Berglind skellti í lás

Stórbrotin frammistaða Berglindar Írisar Hansdóttur í marki Vals lagði grunninn að sigrinum á Stjörnunni á laugardaginn.

Berglind varði 11 skot á fyrstu 15 mínútunum, lokaði hreinlega Valsmarkinu á meðan liðið komst í 5:0 og 10:3. Þegar saman dró og staðan var 16:14 um miðjan seinni hálfleik skellti Berglind aftur í lás og varði sjö skot á meðan Valur komst í 25:15.

Varnarleikur Valsliðsins var líka gríðarlega öflugur á meðan allt sjálfstraust hrundi hjá Garðabæjarstúlkunum við þessa kröftugu mótspyrnu. Kannski mættu þær værukærar til leiks og Sólveig Lára Kjærnested tók undir það í viðtali sem birtist á mbl.is. Þær Kristín Guðmundsdóttir og Morgan Marie Þorkelsdóttir fundu alltaf leiðir í gegnum vörn Stjörnunnar og skoruðu 15 af mörkum Vals.

Tveir stórsigrar á víxl og það er útlit fyrir mikinn slag í Mýrinni í kvöld.

Grótta slapp fyrir horn

Íslandsmeistarar Gróttu fengu hressilega mótspyrnu frá leikmönnum Selfoss í öðrum leik liðanna á Selfossi á laugardaginn. Lokatölur: 23:21. Arndís María Erlingsdóttir innsiglaði sigur Gróttu á síðustu sekúndu en áður hafði Selfoss fengið tvö tækifæri á síðustu mínútu leiksins til þess að jafna metin. Annars vegar átti Elena Brigisdóttir stangarskot af línunni og hinsvegar rataði sending fram leikvöllinn ekki í réttar hendur þegar Selfoss vann boltann þegar 20 sekúndur voru eftir.

Selfoss var með yfirhöndina í fyrri hálfleik en sex Gróttumörk á síðustu mínútunum gegn tveimur mörkum Selfoss urðu þess valdandi að jafnt var í hálfleik, 9:9.

Síðari hálfleikur var meira og minna í járnum og æsispennandi.

„Tilfinningar eru blendnar þar sem áttum möguleika og ætluðum í oddaleik. Við trúðum því fyrir leikinn að við gætum unnið Gróttu og höfum aldrei verið eins nærri því og að þessu sinni,“ sagði Sebastian Alexandersson, þjálfari Selfoss, og var stoltur af sínu liði. „Okkur vantaði meiri reynslu að þessu sinni.“

*Haukar slógu Fylki út á föstudagskvöldið og mæta Stjörnunni eða Val í undanúrslitum. Grótta leikur við annaðhvort Fram eða ÍBV.