Mikill munur milli landshluta

Benedikt Bóas

benedikt@mbl.is

Ævar Petersen fuglafræðingur hefur stundað rannsóknir á lómum í tíu ár en fyrir þann tíma hafði þessi tegund vakið litla athygli til rannsókna hér á landi. Upphaflega voru settir litlir sendar sem kallast ljósritar á lóma en einnig var fylgst með ástandi stofnsins og varpárangri. Jafnframt hefur upplýsingum verið safnað um varpstaði lóma í landinu.

„Ljósritarnir geta sýnt okkur hvar fuglarnir eru hverju sinni og hvar þeir hafa haldið sig yfir veturinn. Við héldum að hann væri farfugl en endurheimt okkar benti til að þeir héldu sig við Ísland yfir vetrarmánuðina,“ segir Ævar.

Lítið um peninga

„Það kom fljótlega í ljós að það var ýmislegt að gerast. Varpárangur á Mýrum var lélegur sem helgaðist af tvennu. Annars vegar af æti, en helsta fæða lómsins er sandsíli, og hins vegar var það refurinn. Það þýðir að fuglinn þyrfti að verpa aftur, sem seinkar varpinu. Einnig vex stofninn vel fyrir norðan en ekki fyrir vestan.“

Ævar segir að peningar séu af skornum skammti til að stunda rannsóknir sem þessar og mun þessa rannsókn væntanlega daga uppi eftir sumarið. „Ég hef fengið styrki frá umhverfisráðuneytinu síðustu ár og fram á sumar sem verður líklega okkar síðasta því það fylgdi bréfinu sem ég fékk að þetta yrði í síðasta skipti sem ég fengi styrk. En það eru nokkrar spurningar sem er ósvarað.“