Handknattleikskonan þrautreynda Hanna Guðrún Stefánsdóttir hefur skrifað undir nýjan samning við Stjörnuna um að leika með liði félagsins næstu tvö árin. Hanna Guðrún hefur verið í herbúðum Stjörnunnar í sex ár og varð bikarmeistari með liðinu í febrúar.
ÍBV hefur fengið leikmann að láni frá enska B-deildarfélaginu Derby County og mun hann spila með liðinu næstu 2-3 mánuði í Pepsi-deild karla í knattspyrnu.
Leikmaðurinn er enskur og heitir Charles Vernam . Hann er 20 ára gamall og leikur sem framherji eða sóknarsinnaður miðjumaður. Hann hefur verið á mála hjá Derby frá árinu 2012 og hefur að undanförnu leikið með U21-liði félagsins, sem er í harðri toppbaráttu í efstu deild.
Vernam mun fá leikheimild á næstu dögum en missir væntanlega af fyrsta leik ÍBV í Pepsi-deildinni, gegn ÍA á Hásteinsvelli á morgun klukkan 17.
Spánverjinn David Silva missir af næstu leikjum Manchester City, þar á meðal seinni undanúrslitaleik Meistaradeildar Evrópu gegn Real Madrid á miðvikudaginn kemur. Manuel Pellegrini , knattspyrnustjóri City, staðfesti þetta á fréttamannafundi í gær og sagði Silva vera tognaðan í aftanverðu læri. Tognunin væri ekki alvarleg en myndi kosta hann allt að þriggja vikna fjarveru.
Knattspyrnumaðurinn Gauti Gautason , sem til þessa hefur leikið með KA, er genginn til liðs við erkifjendurna í Þór og spilar með þeim í 1. deildinni í sumar. Gauti er tvítugur varnarmaður sem festi sig í sessi í liði KA árið 2014 en missti síðan af nær öllu síðasta tímabili eftir að hann braut bein í rist að loknum þremur umferðum í 1. deildinni.
Markvörðurinn Jóhann Ólafur Sigurðsson gæti komið við sögu hjá Fylkismönnum í fyrstu umferðum Íslandsmótsins í knattspyrnu, en hann gekk í gær frá félagaskiptum til þeirra. Jóhann lék með Fylki árið 2006 en hefur annars varið mark Selfyssinga lengst af. Hann lagði þó hanskana á hilluna haustið 2013 vegna náms erlendis. Jóhann sagði við mbl.is að þetta væri aðeins varúðarráðstöfun. Hann er markvarðaþjálfari hjá Fylki, sem aðeins er með einn markmann í sínum hópi sem stendur, Ólaf Íshólm Ólafsson .