Þjarmar enn að Clinton Bernie Sanders öldungadeildarþingmaður á kosningafundi í Oregon-ríki. Sanders sigraði Hillary Clinton, fyrrverandi utanríkisráðherra, í forkosningum demókrata í Vestur-Virginíu í fyrradag.
Þjarmar enn að Clinton Bernie Sanders öldungadeildarþingmaður á kosningafundi í Oregon-ríki. Sanders sigraði Hillary Clinton, fyrrverandi utanríkisráðherra, í forkosningum demókrata í Vestur-Virginíu í fyrradag. — AFP
Trump hampað Bolir með myndum af Donald Trump til sölu við fundarstað í borginni Eugene í Oregon þar sem hann var á atkvæðaveiðum á dögunum.
[ Smellið til að sjá stærri mynd ]
Bogi Þór Arason bogi@mbl.is Ný skoðanakönnun bendir til þess að auðkýfingurinn Donald Trump hafi sótt í sig veðrið í þremur ríkjum sem talið er að geti ráðið úrslitum í forsetakosningunum í Bandaríkjunum 8. nóvember.

Bogi Þór Arason

bogi@mbl.is

Ný skoðanakönnun bendir til þess að auðkýfingurinn Donald Trump hafi sótt í sig veðrið í þremur ríkjum sem talið er að geti ráðið úrslitum í forsetakosningunum í Bandaríkjunum 8. nóvember. Ef marka má könnunina hefur Trump nánast unnið upp forskot Hillary Clinton, líklegs forsetaefnis demókrata, í tveimur lykilríkjanna, Flórída og Pennsylvaníu, og nýtur nú meira fylgis en hún í Ohio. Ekkert forsetaefni hefur verið kjörið forseti Bandaríkjanna frá árinu 1960 án þess að sigra í að minnsta kosti tveimur af þessum þremur ríkjum.

Mitch McConnell, leiðtogi repúblikana í öldungadeild þingsins, sagði könnunina benda til þess að væntanlegt forsetaefni flokksins væri líklegt til að geta veitt forsetaefni demókrata harða keppni.

Sanders sterkari gegn Trump en Clinton?

Samkvæmt könnun Quinnipiac University ætla 43% skráðra kjósenda í Flórída og Pennsylvaníu að kjósa Clinton en 42% Trump ef valið stendur á milli þeirra í kosningunum í nóvember. Í Ohio sögðust 43% ætla að kjósa Trump en 39% Clinton.

Könnunin var gerð í síma frá 27. apríl til 8. maí og náði til rúmlega þúsund skráðra kjósenda í hverju ríkjanna þriggja. Vikmörkin voru þrjú prósentustig.

Í könnuninni mældist öldungadeildarþingmaðurinn Bernie Sanders með meira fylgi en Trump í öllum ríkjunum þremur. Í Flórída sögðust um 44% myndu kjósa Sanders ef svo færi að hann yrði næsta forsetaefni demókrata en 42% Trump. Í Ohio mældist fylgi Sanders 43% en Trumps 41% og í Pennsylvaníu sögðust 47% myndu kjósa Sanders en 41% Trump ef valið stæði á milli þeirra tveggja.

Til að verða forsetaefni demókrata þarf Clinton að fá a.m.k. 2.383 atkvæði á flokksþingi demókrata í sumar og talið er að hana vanti nú aðeins 144 atkvæði. Clinton var með mikið forskot á Sanders í upphafi kosningabaráttunnar en hann hefur veitt henni harðari keppni en búist var við og hefur sigrað í alls nítján ríkjum, meðal annars í Vestur-Virginíu, þar sem kosið var í fyrradag. Nú er eftir að kjósa í átta ríkjum í forkosningunum og svo gæti farið að úrslitin réðust ekki fyrr en 7. júní þegar kosið verður í Kaliforníu þar sem Clinton er spáð sigri.

Kemur Trump aftur á óvart?

Donald Trump getur hins vegar einbeitt sér að baráttunni við demókrata í forsetakosningunum eftir að hafa sigrað keppinauta sína í forkosningum repúblikana. Hann sigraði auðveldlega í tveimur ríkjum, Vestur-Virginíu og Nebraska, í fyrradag.

Flestar skoðanakannanir hafa bent til þess að Clinton sé með sjö til þrettán prósentustiga forskot á Trump í öllu landinu en ný könnun NBC -sjónvarpsins bendir til þess að munurinn sé nú aðeins fimm prósentustig.

Fjölmiðlamaðurinn Joe Scarborough, fyrrverandi fulltrúadeildarþingmaður repúblikana, telur hugsanlegt að Trump komi á óvart í forsetakosningunum í nóvember, eins og í forkosningum repúblikana. Hann segir í grein á vef The Washington Post að þegar spurt sé hvort fólk myndi kjósa Trump eða Clinton komi hann betur út en Mitt Romney gegn Barack Obama í forsetakosningunum fyrir fjórum árum. Hann bendir ennfremur á að forkosningarnar og síðustu fylgiskannanir benda til þess að kjósendur repúblikana séu að fylkja sér um Trump, þótt forystumenn flokksins hafi verið mjög tregir til að styðja hann.

Efnahagsmál réðu mestu
» Bernie Sanders fékk 51% atkvæðanna og Clinton 36% í forkosningum demókrata í Vestur-Virginíu í fyrrdag. Í forkosningunum fyrir fjórum árum sigraði Clinton örugglega í ríkinu þegar hún keppti við Barack Obama.
» Blaðið Charleston Gazette í Vestur-Virginíu segir að stefna Sanders í efnahagsmálum hafi fært honum sigur í ríkinu.
» Blaðið segir að Donald Trump hafi notið mikils stuðnings í Vestur-Virginíu „að hluta vegna reynslu hans í viðskiptum og loforða hans um að fjölga störfum, einkum í kolavinnslu“.