Kristín Þorbjörg Ólafsdóttir

Í minningu góðrar vinkonu, hennar Stínu, sem lést 3. júlí sl., fer hugurinn alla leið til unglingsáranna, við kynntumst í Fellaskóla og nokkrum árum síðar lágu leiðir okkar saman að nýju í Húsmæðraskóla Suðurlands á Laugarvatni. Þar myndaðist traust og góð vinátta . Ferðin okkar til Vestmannaeyja var ávallt rifjuð upp með miklum hlátrasköllum og þegar kom að því að við fengjum bílprófið var Stína ávallt á rúntinum og ekki á minni bíl en Range Rover.

Stína varð bóndakona i Flóanum og eiga þau Ingjaldur fjögur börn og barnabörnin veittu henni einstaka gleði. Þau voru höfðingjar heim að sækja, mikil gleði og umhyggja einkenndi heimilið. Þó svo að umgangur milli okkar hafi minnkað þá var sterk vinartaug sem tengdi okkur öll árin.

Veikindi settu strik i lífshlaup Stínu en með æðruleysi og húmor að leiðarljósi tókst henni að halda sinni reisn. Vil ég senda mínar innilegustu samúðarkveðjur til ástvina hennar, og kveð ég mína vinkonu með virðingu og þökk fyrir allt og allt.