Vilhjálmur Eyjólfsson fæddist á Hnausum í Meðallandi 5. júní 1923. Hann andaðist á Hjúkrunar- og dvalarheimilinu Klausturhólum 21. júlí 2016. Hann var einkabarn hjónanna Eyjólfs Eyjólfssonar, f. 1889, d. 1983, og Sigurlínar Sigurðardóttur, f. 1891, d. 1985. Þau hjón bjuggu á Hnausum frá árinu 1923 til 1970 er Vilhjálmur tók við búsforráðum, en 1983 fluttust foreldrar Vilhjálms til Reykjavíkur til dvalar á elliheimili.
Vilhjálmur þjáðist af heymæði, sem olli honum erfiðleikum við bústörf. Vann hann því í Reykjavík á veturna á árunum 1958 til 1970, aðallega í fiskvinnslu. Þrátt fyrir heymæðina tók hann við búi á Hnausum árið 1970 en hætti búskap árið 1987. Áfram hélt hann þó heimili á Hnausum fram undir árslok 2014, er hann fór á Hjúkrunar- og dvalarheimilið á Kirkjubæjarklaustri, þar sem hann naut góðrar umönnunar.
Vilhjálmur tók við sem hreppstjóri í Leiðvallahreppi (Meðallandi) af föður sínum, sem hafði gegnt þeirri stöðu frá árinu 1919. Vilhjálmur var hreppstjóri í 19 ár, eða þar til allir hreppar Vestur- Skaftafellssýslu voru sameinaðir í eitt sveitarfélag, Skaftárhrepp, árið 1990. Þá var hann fréttaritari Morgunblaðsins í sinni heimabyggð í yfir 30 ár. Ungur að árum fór Vilhjálmur að leiðbeina ferðamönnum um Meðallandið og víðar. Það var þó ekki fyrr en hann var orðinn sjötugur, að hann öðlaðist réttindi í þeirri grein frá Fjölbrautaskóla Suðurlands á Selfossi. Vilhjálmur var söngmaður góður og söng lengi í kirkjukór sinnar sóknar.
Útför Vilhjálms Eyjólfssonar fer fram frá Langholtskirkju í Meðallandi í dag, 28. júlí 2016, og hefst hún klukkan 14.
Okkur nútímamönnum hættir til að líta nokkuð oft á klukkuna, eins og við væntum þess, að þar með fáum við staðfestingu þess, að við séum til. Auðvitað höfum við ekkert upp úr þessu annað en taugaveiklun, en það er önnur saga. Villi á Hnausum hafði ekki áhyggjur af tímanum, enda var hann ekki nútímamaður, heldur allra tíma maður. Eins og sannur Meðallendingur hafði hann aðeins eitt viðmið á tímann; það voru Skaftáreldar. Öll önnur viðmið voru hégómi.
Hugur Villa hvarflaði víða. Hann var ekki frá því, að fornar minjar ekki langt frá Hnausabænum bentu til byggðar manna þar um slóðir fyrir Krists burð. Fræðimenn voru ekki trúaðir á það – létu sér Landnámu duga. Einhvern veginn hefur mér alltaf þótt sá maður vitrari sem leitar, heldur en hinn, sem telur sig hafa fundið. En nóg um það.
Hugur Villa var síhvikull og frjór. Hann var lífsleitarmaður, bæði innan og handan þessa heims. Og hann var þeirrar náttúru, að öllum sem honum kynntust þótti vænt um hann. Þess naut hann í ellinni, því án nágranna sinna, ekki síst á Lyngum, hefði honum ekki auðnast búsetan á Hnausum jafn lengi og raun ber vitni. Fyrir það var hann þakklátur.
Skaftfellingar eru öðrum mönnum orðvarari. Afgerandi orð eins og „já“ og „nei“ hljóma í þeirra eyrum sem gífuryrði. Líkjast þeir að þessu leyti frændum okkar, Færeyingum. Ég er ekki frá því, að þarna valdi einangrun og óblíð náttúruöfl nokkru um. Stundum, þegar fréttir bárust um fárviðri í Meðallandi, sló ég á þráðinn til Villa, til að vita hvort þakið væri að fjúka af húsi hans. Þá gerðist Villi svo djarfur að taka nokkuð stórt upp í sig með því að segja si svona: „Hann er eitthvað að ganga upp að austan.“ Annað var það nú ekki.
Frá árslokum 2014 dvaldist Villi á Hjúkrunar- og dvalarheimilinu á Klausturhólum. Þar naut hann þeirrar ástúðar og virðingar starfsfólksins, sem honum bar. Hafi það þakkir fyrir.
Okkur hjónum auðnaðist að heimsækja Villa tveimur dögum áður en hann lést. Það er gott að geta kvatt vini sína áður en þeir leggja í langferðina miklu. Og þar tók staf sinn og mal maður sem vissi hvert hann stefndi og óttaðist ekki. Sé hann kært kvaddur með eftirfarandi ljóði:
Hin hljóða, bjarta sumarnótt
þig sveipar kyrrð og mildri þögn
og regnið fellur ofur rótt
á glugga þinn.
Hver þraut úr vegi vikin er
og sorgir gleymdar, vinur minn,
er gengur þú í tign og ró
til fundar við þinn vinafjöld;
þau falla og rísa
hin dimmu tjöld.
Pjetur Hafstein Lárusson.
Í áföngum stundaði Vilhjálmur störf í Reykjavík en Hnausar var heimilið alla tíð. Þar tók við athöfn bóndans og hreppstjórans. Um langt árabil var Vilhjálmur fréttaritari Morgunblaðsins í „sveitum milli sanda“ og minntist er svo bar undir látinna samferðamanna á síðum þess. Merkir fróðleiksþættir hans hafa birst í héraðsritinu Dynskógum. Rækt Vilhjálms við forna þjóðmenningu var einstök og þakkarverð. Gömul bæjarhús á Hnausum hafa haldist til dagsins í dag fyrir atbeina hans. Eitt þeirra, forna fjósið hans með setpalli og svefnpalli, er ómetanlegt byggingarsögulega séð. Mér og Skógasafni er það mikill heiður að hafa átt þátt í að styrkja Vilhjálm í því björgunarstarfi. Nær leiðarlokum gaf hann Landgræðslu ríkisins höfuðból sitt, Hnausa, með húsum og hlunnindum. Gjöfult og fagurt veiðivatn, Eldvatn, streymir þar með túnfæti. Landgræðslunnar bíður það heiðursverk að virða þegna gjöf og vernda forn hús á Hnausum.
Með Vilhjálmi hverfur einn síðasti og merkasti tengiliður þjóðarinnar við þá menningu sem hér réði landi um aldir. Til hans var jafnan gott að grípa ef eitthvað leitaði svars í grúski gamalla fræða. Raunsæi hans á mannlega tilveru stóð föstum fótum en hann átti einnig sterkt næmi á þá dul er býr bak við tímans tjald. Frændi okkar og vinur, Guðni Sigurðsson á Maríubakka, túlkar þetta vel í tveimur vísuhendingum til Vilhjálms:
Skýr í hugsun, skarpur nóg
Skyggn á dulið sindur
Mér var það gleði í heimsókn að Hnausum sumarið 2014 að skrifa upp eftir Vilhjálmi fagurorta afmælisdrápu hans til frænda míns, Gísla Tómassonar bónda á Melhól, einnig að hafa dregið í dagsins ljós óprentað leikrit samið af Vilhjálmi. Hann „rís ekki þögull frá dísanna borði“. Hjá honum fór saman atgjörvi líkama og sálar. Andlegt samfélag okkar í símtölum eftir að hljóðnaði í húsi á Hnausum var okkur báðum góð og gagnsöm dægrastytting. Bölið mikla að vera sviptur sjón um mörg ár bar Vilhjálmur með reisn, víl var víðsfjarri. Hann prýddi og lífgaði hvern þann mannfögnuð er hann sótti heim, jafnt í samræðu og söng. Bestu söngstundir sínar átti hann í kór Langholtskirkju þar sem fögur bassarödd hans naut sín vel. Listræn söngtafla kirkjunnar, gjöf Vilhjálms, minnir á hann og foreldra hans og á frægasta Meðallendinginn, Kjarval.
Vinir Vilhjálms hljóta að þakka Soffíu og Sigursveini á Lyngum, Kristínu og Guðbrandi á Syðri-Fljótum og starfsliði Kausturhóla fyrir öryggi og umhyggju honum til handa öll hin síðari ár. Vilhjálmur gleymist engum er af honum höfðu kynni. Skarðið eftir hann verður aldrei fyllt.
Þórður Tómasson.
Á Hnausum var vel hugsað um bæjarhrafnana. Þeir voru tveir og sagði Vilhjálmur að þeir hefðu orðið mjög elskir að móður hans Sigurlínu Sigurðardóttur sem færði þeim margt góðgætið. Þegar hún var úti við flugu þeir með henni til fylgdar og þegar hún var orðin léleg til gangs og gekk við staf úti nær blind þá gekk annar þeirra á undan henni og hinn á eftir.
Vilhjálmur hafði brennandi áhuga á sögu, setti fram byltingarkenndar kenningar og reyndi að hraða rannsóknum þannig að menn öðluðust nýja þekkingu. Ég kynntist honum þannig að að hann kom í heimsókn til mín ásamt frænda sínum Ingimundi Stefánssyni, kennara mínum og fjölskylduvini í Bolungarvík. Tilgangurinn var að ræða rústir á Hnausum. Sumar þeirra í Hvannakeldurofi höfðu komið í ljós þegar Eldvatnið breytti um farveg og skolaði ofan af þeim margra mannhæða þykku sandlagi sem þær höfðu einhvern tímann í fornöld grafist undir í Kötluhlaupi. Það var trú Vilhjálms að þetta væri ævaforn byggð mun eldri en norrænt landnám. Þar hafði Ingimundur fundið brot af keri sem send voru Þjóðminjasafni. Margar vísbendingar eru um að kenningar Vilhjálms um forna byggð í Meðallandi séu réttar, sem tíminn muni leiða í ljós. Nokkra leiðangra fórum við saman ásamt góðu fólki og skoðuðum þennan stað og ávallt var notið gestrisni og höfðingsskapar hins aldna höfðingja á Hnausum.
Vilhjálmur var stórtækur í gjöfum sínum og gaf nú síðast fyrir andlát sitt Landgræðslu ríkisins jörðina Hnausa og veiðihlunnindin í Eldvatninu. Hugmyndir höfðu verið ræddar um að koma upp rannsóknarsetri í náttúrufræði, sagnfræði og stað fyrir rithöfunda í Hnausabænum til minningar um hann og foreldra hans. Vonandi er að nýir eigendur beri gæfu til að forðast græðgisvæðinguna og nýti þessa góðu gjöf til góðra verka í anda Vilhjálms Eyjólfssonar.
Þorvaldur Friðriksson.
Þegar Villi kom við var ætíð reynt að fara í heimsókn eða fá einhvern í heimsókn. Sveinn Skúlason í Bræðratungu var einn þeirra en feður þeirra Villa höfðu verið saman í Flensborg í upphafi 20. aldar – með í för var þá jafnan Páll Lýðsson, hreppstjóri í Sandvíkurhreppi, mikill vinur Sveins. Heimsóknir þessar voru Villa mikið ánægjuefni sem og hinna sem fengu að njóta.
Svo varð það að venju á tímabili að kalla á sameiginlegt frændfólk þegar Villi kom. Systkini hér í Hveragerði, barnabörn Árnýjar Eiríksdóttur: Alli (Aðalsteinn), Dóra (Halldóra) og Bagga (Sigurbjörg) Steindórsbörn og makar þeirra sem lifðu. Árný var hálfsystir Ingimundar og Eyjólfs, sem við Villi röktum okkur til. Margt var skrafað og mikið hlegið í þessum heimsóknum. Eins og fyrr tók fólkið upp á því að týnast til forfeðranna.
Eftir var þá Kjartan sægreifi Halldórsson frá Syðri-Steinsmýri. Það var fallegt að sjá hversu innilega honum þótti vænt um vin sinn Villa og samsveitung. Hann dó fyrir aldur fram í upphafi síðastliðins árs. Þá var Villi kominn á Klausturhóla. Nú hefur hann kvatt síðastur af þessum hópi fólks, sem leitast var við að hitta er hann kom við hjá okkur hér í Hveragerði.
Ég er þakklát fyrir að hafa náð að kveðja Villa tveimur dögum áður en hann kvaddi. Augljóst var að við vissum bæði að þetta væri hinsta kveðja. Minning hans lifir og að því kemur að við heilsumst á ný.
Ingibjörg Ólafsdóttir.
Eftir upphafskynnin kom Vilhjálmur og húsvitjaði reglulega. Svo voru heimsóknir hans endurgoldnar. Vináttan var ræktuð og samgangur hélst þótt fjölskyldan flytti í aðra landsfjórðunga. Þar sem Vilhjálmur kom til nokkurra daga dvalar gat ég fylgst með því sem hann vann að. Honum var í mun að varðveita fróðleik, munnmæli, sögur, atburði og hóf skriftir á fullorðinsaldri. Meðal þess, sem Vilhjálmur setti á blað, voru minningar Einars Einarssonar djákna. Vilhjálmur kom efninu á blöð sem hann setti í mínar hendur til að slá inn og koma á tölvutækt form. Ég varð því ritari Vilhjálms og fékk innsýn ekki aðeins í heim djáknans heldur líka Hnausabóndans, vinar míns. Ritsmíðin var prentuð í héraðsritinu Dynskógum.
Vilhjálmur Eyjólfsson var andlega og fræðilega fangvíður. Hann var víðlesinn fjölfræðingur og því gefandi að ræða álitamál við hann. Alla ævi íhugaði hann skaftfellska náttúru og sögu og miðlaði til þeirra sem vildu við taka. Einu gilti hvort rætt var um jarðfræði, guðfræði, heimspeki, landafræði, líffræði, dulræn efni eða kirkjusögu. Eldfjallafræði var honum sérlega hugleikin, en einnig byggðasaga, landamerkjamál, verndun fiskjar og ábyrg nýting. Svo sá Vilhjálmur fleira en við hin og í sumu einnig lengra. Í þeim efnum var ekki komið að tómum kofum. Veröld Villa á Hnausum var stór. Hann lifði lífinu í fagurri lotningu gagnvart undri veraldar. Hann var gjöfull samfylgdarmaður.
Fyrir hönd barna minna og fjölskyldu þakka ég vináttu, fræðslu, umhyggju og elskusemi Vilhjálms á Hnausum. Guð geymi hann í lygnu eilífðar.
Sigurður Árni Þórðarson.
Þuríður Pétursdóttir.
Foksandur ógnaði jörðinni á fyrri hluta síðustu aldar og afhenti þá Eyjólfur Sandgræðslu Íslands hluta Hnausa og Hólmalands til sandgræðslu. Villa þótti vænt um Hnausa og á efri árum sínum afhenti hann Landgræðslunni alla jörðina, ásamt hluta af Skarðslandi og Hólmalandi til eignar og varðveislu, ásamt bæjarhúsum og innbúi. Einstök fjósbaðstofa, smiðja og stofuhús eru háð lagaákvæðum húsafriðunar. Villi lagði oftar en einu sinni fjármuni til að viðhalda og lagfæra þessar fágætu fornminjar á jörðinni í samstarfi við vin sinn Þórð Tómasson á Skógum. Fjósbaðstofan þarfnast nú viðhalds og einnig bíða uppgræðsluverkefni á jörðinni, sem brýnt er að takast á við.
Villi var einstaklega sögufróður maður, hafsjór af fróðleik og kunni öllum öðrum betur skil á sögu sveitarinnar, mönnum og málefnum. Sem betur fer auðnaðist undirrituðum að láta skrá talsvert af umfangsmikilli þekkingu hans á nær gjöreyðingu sveitarinnar af völdum sandfoksins og breytingum á vatnafari sem ógnaði byggðinni. Það var einstök upplifun að njóta leiðsagnar hans um fornminjar á bænum og ótrúlegt minni hans var óbrigðult fram á síðasta dag.
Hann var ljúfmenni og dagfarsprúður, og það var mér heiður að fá að eiga við hann samskipti. Frá honum stafaði innri hlýja og alltaf lærði ég eitthvað í hvert skipti sem mér auðnaðist að heimsækja hann. Það voru forréttindi að kynnast honum og minningin um góðan dreng lifir. Að leiðarlokum er mér efst í huga söknuður og þakklæti fyrir áralanga vináttu og heilladrjúgt samstarf og samskipti sem aldrei bar skugga á.
Ættingjar og vinir kveðja nú mikilhæfan mann með söknuði og þakklæti fyrir að hafa fengið að njóta samvistanna við hann. Ég bið þeim Guðs blessunar og votta þeim mína dýpstu samúð. Megi almættið, sem leiðir okkur og alla þá er hjarta þitt sló fyrir, leiða þig í sólina kæri vinur.
Sveinn Runólfsson.
Við feðgarnir drógum þó ekki árar í bát og komum að Hnausum um hádegi. Þar sauð þríhlutað veturgamalt læri í potti, smjör á borði eins og hver vildi og brauð ef hitt myndi ekki duga. Það var greinilegt að Villi var með á hreinu hvað Páll frændi hans kunni að meta en því nú verr vantaði aðal manninn upp í þríeykið. Áttum við feðgar dagsspjall við Vilhjálm um heima og geima og ég get ekki ímyndað mér þann sem hefur komið að tómum kofunum hjá honum þegar fjallað var um sagnir og sögur. Það sem mér finnst einna fróðlegast og merkilegast var hversu víðlesinn hann var og rökfastur gagnvart landnámi fyrir Landnám. Svo sem ekkert skrítið, hann bjó ofan á einu slíku og sagði að þó smiðjan væri gömul þá væri það sem er undir henni enn eldra.
Nú eru þeir náfrændur gengnir á vit feðranna og sameinaðir á ný og okkar hinna að taka við keflinu í hinni eilífu keppni við Elli kerlingu.
Sindri Karl Sigurðsson.