Nú eru þær breytingar að verða að erlendir aðilar eru að hasla sér völl í íslenskri verslun í auknum mæli. Nýlega var tilkynnt um að sænska verslunarkeðjan H&M myndi opna verslun í Smáralind og viðræður séu í gangi við þá um að opna verslun í Kringlunni líka. Einnig eru staðfest áform Costco um opnun verslunar á næstu misserum. Fyrir var svo verslun Bauhaus með vörur fyrir hús, heimili og garða. Þessar verslanir verða í eigu og reknar af erlendum móðurfélögum þeirra.
„Ég fagna komu H&M. Það hafa margir verið að reyna að fá þá til landsins í gegnum tíðina. Það er óeðlilegt að stór hluti verslunar landsmanna sé annars staðar en hér á landi. H&M hefur haft 40% af verslun með barnafatnað og 25% af verslun með kvenfatnað. Það er því fagnaðarefni að þessi viðskipti flytjist inn í landið og að ríkissjóður fái auknar tekjur af þessum umsvifum. Þar fyrir utan hafa þeir mikið aðdráttarafl fyrir verslanir í kring. Við viljum bara vera nálægt þeim. Við óttumst ekki að þeir taki viðskipti frá okkur. Við erum íslenskt fyrirtæki og skiljum íslenska markaðinn. Það eru sífelldar breytingar á markaðnum og við getum brugðist miklu hraðar við breytingum í eftirspurn heldur en risi á borð við H&M. Að auki eru þeir ekki á nákvæmlega sama markaði og við. Þeir komast þó næst því að vera á sömu slóðum og lægsti verðflokkurinn í Gallerí Sautján en það setur okkur þá á tærnar að gera enn betur og öðruvísi. Svava segist hafa gaman af áskorunum og hún kvíði þessari ekki. „Þetta verður okkur bara hvatning til að gera enn þá betur.“
Til baka
Leita í greinasafni
Prenta grein
