Frans páfi hvatti í gær alla íþróttamenn sem nú eru á leið á Ólympíuleikana í Ríó í Brasilíu til að sýna drengskap og standa saman í stað þess að hugsa einungis um verðlaunagripi.
„Ég vona að andi Ólympíuleikanna verði öllum innblástur, þátttakendum jafnt sem áhorfendum, til að keppa heiðarlega og ljúka um leið keppnisgreinum í sameiningu,“ sagði Frans páfi er hann ávarpaði hóp pílagríma við Vatíkanið í Róm.
Sagði hann markmið Ólympíuleikanna vera skýrt; að koma á og viðhalda siðmenningu þar sem samstaða ríkir á grunni þeirrar vitundar að mannkyn allt sé ein fjölskylda, óháð menningu, húðlit og trúarbrögðum.
„Heiminn þyrstir í samstöðu, umburðarlyndi og sættir,“ sagði hann og bætti því að veröldin væri nú „sjúk og grimm“. khj@mbl.is
Til baka
Leita í greinasafni
Prenta grein
