„Gott að fá sér yljandi og orkuríka súpu þegar kólna tekur í veðri“

Ásgeir Ingvarsson

ai@mbl.is

Veitingastaðurinn Kryddlegin hjörtu á Hverfisgötu hefur dafnað vel frá því reksturinn hóf göngu sína fyrir átta árum. Fastakúnnarnir eru fjöldamargir og sækja í ljúffenga og heilnæma réttina þar sem fara saman straumar og stefnur frá öllum heimshlutum.

Dagbjört Norðfjörð er framkvæmdastjóri veitingastaðarins en það var móðir hennar Íris Hera Norðfjörð Jónsdóttir sem hóf reksturinn á sínum tíma. „Segja má að við opnum beint inn í kreppuna, 29. ágúst 2008,“ segir Dagbjört. „Hún mamma er mikill sérfræðingur í kryddi og notar það ekki bara til að bragðbæta matinn heldur hefur víðtæka þekkingu á heilsufarslegum áhrifum kryddjurta. Hún kenndi fólki um þetta í morgunsjónvarpinu á sínum tíma og flutti inn kryddtegundir sem seldar voru í verslunum Hagkaupa. Atvikast hlutirnir þannig að Íris tekur að sér matseldina í mötuneyti á stórum vinnustað, en missir svo starfið við samruna við annað fyrirtæki þar sem fyrir var mötuneytisrekstur. En á meðan hún fékk að spreyta sig varð hún vör við mikla hvatningu frá þeim sem smökkuðu matinn, og hún var í miklum metum hjá starfsfólkinu fyrir réttina sína.“

Vildi þannig til að veitingastað hafði nýlega verið lokað í miðbænum og stóð Írisi til boða að kaupa innrétingar og eldhústæki sem komið hafði verið fyrir í gámi. „Hún átti ekki krónu með gati, en fékk lán hjá ömmu, nýtti allt sem nýta mátti úr gáminum og keypti að auki það litla sem upp á vantaði. Hún kom sér fyrir á Skúlagötu og síðan að 5 árum síðar keyptum við plássið á Hverfisgötu. Var hugsunin upphaflega að vera bara með súpu- og salatbar og hafa reksturinn ekki mjög stóran, en svo breyttist það smám saman og er matseðillinn í dag allt öðruvísi en hann var þegar við vorum að byrja.“

Vita hvaðan maturinn kemur

Eitt helsta sérkenni Kryddleginna hjartna er að allur maturinn er gerður frá grunni. „Baunirnar kaupum við lífrænar frá ræktendum og leggjum í bleyti og fullvinnum. Ekkert er úr niðursuðudós nema tómatar og maískorn. Okkar áhersla hefur ætíð veri á að vita hvaðan maturinn er og nákvæmlega hvað er á diskinum. Enginn sykur er notaður í matseldina, ekkert hveiti og ekkert ger en krydd frá öllum heimsálfum. Matseðillin er glútenfrír, að brauðin undanskildu, og vegna hreinleika hráefnisins eru margir af okkar kúnnum fólk sem er með ofnæmi eða þarf að passa sérstaklega upp á mataræðið.“

Eini íslenski rétturinn er rammíslenska kjötsúpan sem borin er fram á fimmtudögum en í lágkolvetnaútgáfu með engum kartöflum eða hrísgrjónum, og með fyrsta flokks lambakjöti frekar en súpukjöti. „Á matseðlinum gætir marokkóskra áhrifa, indverskra og mexíkóskra, og erum við t.d. núna með fjóra indverska rétti og þar af einn vegan. Einnig bjóðum við upp á lasagna, fiskrétti, tandoori og kóríander með kúskús. Ekkert er brasað nema kannski tacos og nachos sem við steikjum sjálf upp úr olíu.“

Réttirnir þykja margir bæði seðjandi, bragðgóðir og ekki hvað síst næringgarríkir. Bendir Dagbjört á að gæði matarins virðast hafa kvisast út á meðal fólks sem glímir við veikindi og erfiðar læknismeðferðir. „Krabbameinssjúklingar sækja t.d. mikið til okkar til að fá kraftinn úr matnum þegar meðferðin leyfir kannski ekki annað en fljótandi fæði. Fyrir utan að góð súpa gefur fólki vellíðan.“

Sprenging með haustinu

Kryddlegin hjörtu hafa opið frá 11.30 til 21 frá mánudegi til miðvikudags, og til 22 frá fimmtudegi til sunnudags. Segir Dagbjört nóg að gera alla daga vikunnar, allt árið um kring, en með haustinu breytist þó gestakomurnar. „Aukið streymi ferðamanna hjálpar en meirihluti viðskiptavinanna er þó Íslendingar. Að fara út að borða er löngu orðið reglulegur partur af tilverunni, og skýrist kannski að hluta til af því hvað við vinnum mikið og höfum lítinn tíma til að elda, en líka að fólk hefur tamið sér að láta eftir sér þennan hversdagslega lúxus,“ segir Dagbjört og bætir við að greinilegt sé að gestir veitingastaðanna fylgist vel með verðinu. „Ég hugsa að um 70% af okkar kúnnahóp séu Íslendingar og þýðir það að er hvað rólegast hjá okkur á sumrin þegar fólk fer í frí, skýst út á land eða til útlanda. Svo kemur sprengja um leið og skólarnir byrja og veturinn gengur í garð enda gott að fá sér yljandi og orkuríka súpu þegar kólna tekur í veðri.“