Bróðir Gülen handtekinn í Tyrklandi

Börkur Gunnarsson

borkur@mbl.is

Tyrkneska lögreglan handtók bróður Fethullah Gülen í gær en hann er sakaður um að bera ábyrgð á valdaránstilrauninni í júlí síðastliðnum.

Síðan valdaránstilraunin fór út um þúfur hafa á bilinu 35 - 47 þúsund manns verið handteknir í Tyrklandi og sakaðir um að tengjast valdaránstilrauninni. Mörgum finnst talan vera ansi há þegar hugsað er til þess hversu máttlaus og misheppnuð valdaránstilraunin var. En hún kostaði engu að síður á þriðja hundrað manns lífið.

Eigurnar gerðar upptækar

Gülen dvelur í sjálfskipaðri útlegð í Bandaríkjunum. Gülen var áður stuðningsmaður Erdogan á leið hans til valda, en svo kom upp ágreiningur þeirra á milli sem varð harðvítugur.

Bróðir Fethullah Gülen flúði aftur á móti ekki land. Hann heitir Kutbettin Gülen og var handtekinn eftir að lögreglu barst ábending um hvar hann væri að finna. Var hann á heimili ættingja í Gaziemir-sýslu í Izmir-héraði. Hann er fyrstur af Gülen systkinunum sem er handtekinn í tengslum við valdaránstilraunina.

Hann er sakaður um aðild að vopnuðum vígasamtökum, segir í frétt tyrknesku ríkisfréttastofunnar.

Kutbettin er í yfirheyrslum hjá hryðjuverkadeild lögreglunnar og eigur hans hafa verið gerðar upptækar.

Bróðir hans, sem tyrknesk stjórnvöld hafa sakað um að vera höfuðpaurinn í valdaránstilrauninni, býr aftur á móti enn í Bandaríkjunum og hafa yfirvöld þar ekki sýnt nein merki um að þau ætli að framselja hann til Tyrklands, þótt löndin séu bandamenn innan NATO.