Laugardagsgátan er sem endranær eftir Guðmund Arnfinnsson:
Fá hann allan viljum við.
Veitir slökun, ró og frið.
Úr honum margur fylli fær.
Fallegt blóm í honum grær.
Harpa á Hjarðarfelli svarar:
Lottópottinn viljum við.
Veitir pottur ró og frið.
Úr matarpotti fylli fær.
Frítt í potti blómið grær.
Helgi Seljan á þessa lausn:
Lottópottinn allan menn langar oft að fá
og lúinn hverfur víst í potti heitum.
Í potti góðum margan bita löngum líta má
og ljúfast blóm í potti er fegurst veit um.
Pétur Friðrik Þórðarson leysir gátuna þannig:
Ilma betur enginn kann
Ofsa er ‘ann flottur
Ánægja að eiga hann
Þú ert að meina „pottur“?
Guðrún Bjarnadóttir svarar:
Allan bollann, ekki hálfan,
því engiferte róar best.
Með blótbolla ölum Óðin sjálfan.
Engjarós í bolla sést.
Helgi R. Einarsson á þessa lausn:
Að vinna hann og vera í
með vinum þykir gott.
Í honum sýð, um blómin bý
og bendi því á pott.
Sjálfur skýrir Guðmundur gátuna þannig:
Pottinn allan viljum við.
Veitt fær heitur pottur frið
Úr potti margur fylli fær.
Fallegt blóm í potti grær.
Þá er limra:
Í lukkupottinn datt Pétur,
sem Pálínu fékk í vetur,
hún fór burt með Svía,
þá fékk hann sér nýja
og hrósað nú happi getur.
Og að lokum ný gáta eftir Guðmund:
Í bólinu ég lengi lá
laugardagins morgni á,
latur fór ég loks á stjá,
líta gátu hérna má:
Varla dæll er við að kljást.
Við það kennt er lítið sparð.
Að því grasi ýmsir dást.
Af þeim bita gott mér varð.
Hér er gömul vísa í lokin:
Margan galla bar og brest
bágt mun varla að sanna.
Drottinn alla dæmir best;
dómar falla manna.
Halldór Blöndal
halldorblondal@simnet.is