Strokkvartettinn Siggi heldur tónleika í Norðurljósasal Hörpu á morgun, sunnudag, klukkan 17. Á tónleikunum verða frumfluttir þrír glænýir strengjakvartettar eftir ung íslensk tónskáld, þau Báru Gísladóttur, Finn Karlsson og Halldór Smárason. Auk þess mun Strokkvartettinn Siggi flytja eitt af síðustu stórvirkjum Beethovens, strengjakvartett í a-moll, ópus 132.
Strokkvartettinn Siggi er skipaður fiðuleikurunum Unu Sveinbjarnardóttur og Helgu Þóru Björgvinsdóttur, Þórunni Ósk Marinósdóttur á víólu og Sigurði Bjarka Gunnarssyni á selló. Öll hafa þau látið mikið að sér kveða í íslensku tónlistarlífi sem einleikarar og flytjendur kammertónlistar auk þess að vera meðlimir í Sinfóníuhljómsveit Íslands.
Sigurður Bjarki segir að kvartettinn hafi farið í samstarf fyrir þetta starfsár við hóp ungra tónskálda sem hafi samið verk sérstaklega fyrir þau að leika. „Nú leikum við hluta þeirra og lékum önnur ný verk fyrr í vetur,“ segir hann.
„Þau taka kvartettformið rosalega misjöfnum tökum enda eru þau ólík tónskáld. Eitt verkið er elektrónískt að hluta, annað hefðbundnara og þriðja tónskáldið er mjög uppátækjasamt í sinni nálgun. Þetta er óhefðbundið á ýmsa vegu.“
Fyrir vikið, segir Sigurður, þá reynir flutningur þessara verka öðruvísi á flytjendur en flutningur eldri klassískra verka. „Við erum öllu vön en nýju verkin mynda áhugaverðan kontrast við klassíkina. Það hefur verið þema hjá okkur í Sigga að vinna með ný óhefðbundin verk og eldri saman, eins og nú þegar við flytjum þennan stóra kvartett Beethovens. Efnisskráin hjá okkur byggist oft á miklum innbyrðis andstæðum.“
Strokkvartettinn Siggi var stofnaður árið 2012 og hefur síðan frumflutt verk fjölmargra tónskálda auk þess að leggja rækt við tónlist gömlu meistaranna.
Til baka
Leita í greinasafni
Prenta grein
